א העכסט עלעגאנטער באנקעט איז אפגעראכטן געווארן זונטאג פרשת שופטים ביינאכט, ווי עס האבן אנטייל גענומען א רייע פרישע נגידים וואס האבן זיך אנגעשלאסן אינעם מאסיוון "עמודי העולם" קאמפיין אין שיכון סקווירא.

דער רעוואלוציאנערער פראיעקט גיבט די מעגליכקייט פאר בעלי בתים און נגידים צו "טאפלען" דעם געהאלט פון די ארטיגע בני תורה, דורכן זיך אויסקלויבן א פריוואטן "שותף" פון צווישן די קרוב צו טויזנט אברכי הכוללים און שליסן מיט אים א פערזענליכן "הסכם יששכר זבולון".

ביים מעמד האט דער אנגעזעענער קאנגרעסמאן מייק לאולער וועלכער האלט אן א נאנטן קשר מיט קהילת סקווירא מיטגעטיילט העכסט אינטערעסאנטע אינפארמאציע פון אונטער די קוליסן.

 ער האט ארומגערעדט איבער זיינע פילע פעולות און שתדלנות אין נאכפאלג פון די היסטארישע אסיפה וואס איז פארגעקומען עטליכע מאנאטן צוריק בבית כ"ק אדמו"ר מסקווירא שליט"א, בהשתתפות כ"ק אדמו"ר מסאטמאר שליט"א און כ"ק אדמו"ר מוויזשניץ מאנסי שליט"א.

דערנאך האט אויפגעטראטן הגה"צ ר' יעקב שלמה מייזליש שליט"א, אבד"ק לימנוב שליט''א. ער האט שטארק ארויסגעהויבן דעם העראישן שריט פון די סקווירער בעלי מסחר, וועלכע האבן אויף אן אייגענער איניציאטיוו גענומען די אברכים אויף זייערע פלייצעס מיטן איינציגן ציל צו קענען מרבה זיין כבוד התורה.

צום שלוס פונעם געהויבענעם אוונט האבן איבער פערציג נדיבים אונטערגעשריבן אויפן ארט דעם שותפות אפמאך, אויסוועלנדיג זייער בן תורה און נעמענדיג אויף זיך די זכיה פון צאלן זיין טאפלטן געהאלט.