אין א היסטארישע שריט איז היי יאר קבר רחל געווען פארשלאסן אינעם טאג פונעם יארצייט, פילע אידען זענען ארויף צום קבר פון בנימין בן יעקב אבינו ורחל אמינו  וואס געפונט זיך אין הארץ פון ירושלים צווישן שטראוס און ישעיהו גאס. גרויס התרגשות און וואונדערליכע אנטדעקונגען אויפן מקום קדוש.

פארגאנגענם דאנערשטיג פרשת לך לך י"א חשון תשפ"ד ביומא דהילולא פון מאמע רחל און אזוי אויך די יומא דהילולא און געבורטסטאג פון בנימין בן יעקב ורחל אמינו, די יונגסטער פון די שבטים, ווען צוליב דער מצב המלחמה באה"ק איז ליידער היי יאר קבר רחל געווען פארשלאסן אינעם טאג פונעם יארצייט, זענען מאסן אידען ארויף שופך שיח זיין צום קבר פון בנימין בן יעקב ורחל דער יונגסטער פון די הייליגע שבטים, פון מיטוואך פארנאכט ביז פרייטיג פארטאגס. דער קבר געפונט זיך אין ירושלים צווישן שטראוס און ישעיהו גאס.

נאך צענדליגע יארן וואס דער  אור אלט בנין שטייט נאכגעלאזט באהאלטען אין א פובליק פארק צווישן בנינים און ווילד באוואקסען ארום, האבן די טויערען פון דער אור אלטע געביידע זיך אויפגעמאכט פאר די מתפללים אן קיין שום שטער מצד די אוטאריטעטן. די הילולא איז צושטאנד געקומען דורך א גרופע ענערגישע עסקנים בראשם פון הרה"ח ר שמואל גראד שליט"א פון לאנדאן.

דער בנין פון קבר בנימין וואס קוקט אויס אין איר געבוי אקוראט ווי דער קבר פון רחל, פארמאגט א מסורה פון די תלמידי הגר"א אז דאס איז דער מקום קבורת בנימין און אזוי אויך ווערט דערמאנט אין די גמרא (סנהדרין צח ע”א) דער מקום "פתחא דקרתא" אלס דער מקום ווי משיח געפונט זיך. אזוי ווערט אויך קלאר דערמאנט אין ספר הישר "את שנים עשר בני יעקב קברו בני ישראל איש באחוזת בניו; איש בעיר בניו קברו בני ישראל את אבותם. ואת בנימין קברו בירושלים נגד היבוסי" (ספר הישר, יהושע פרק אחרון). אויך שטייט אזוי אין ספר חיבת ירושלים און אין ספר מסעות משה.

פיל זקנים און מקובלים אין ירושלים וביניהם האדמו"ר מפאריסוב שליט"א ולרפו"ש והרה"צ ר אביש ציינטווירט שליט"א ור"י שיינפעלד שליט"א זענען שוין יארן לאנג פוקד אט דער פלאץ.

דער מקום איז ביז היינט נישט געווען מפורסם אויף א גרויסען פארנעם, אבער אין די לעצטיגע צייט הערשט א אויפוואכונג ביים ציבור אין ירושלים אויף אט דער מקום, באזירט אויף קראנטע מקורות אז אט דאס איז דער קבר פון בנימין בן יעקב ורחל וואס ציט אינטערעסע איבער די גאנצע וועלט..

עס איז באזונדער געווען אנמערקזאם תלמידים פון המקובל הרה"צ רבי יצחק מאיר מארגענשטערן שליט"א וואס זיי זענען אנגעזאגט געווארן דורך אים פוקד צו זיין דעם ציון. עס האט געהערשט א גרויס התרגשות ביי די מאסן און ביי אידן מאנשי ירושלים יישוב הישן און פון אלע חסידות און קרייזען.

ווי מ'געט איבער האט דארט געהערשט א געוואלדיגע התעוררות ווען אידען האבען אויסגעזאגט גאנץ תהילים געצינדען ליכט און געבלאזען מיט שופרות און איינגעריסן פאר ישעות וגאולת כלל ישראל. צענדליקע באזוכער מזקני ירושלים האבן דארט פארציילט וואס זיי האבן מקובל אויף דעם פלאץ אלס קבר בנימין.

אין א גאר דראמאטחשע אנטוויקלונג זענען אויך דארט אוועזנד געווען חוקרים וואס האבען געטראפן און אנגעוויזן אויף א שטיין מיט אויסקריצונגען אין כתב עברי עתיק פון זמן בית ראשון דער ווארט "בנימין" און א ציור פון א "זאב". ווי עס שטייט אין פסוק בנימין זאב יטרף! עס זענען פארגעקומען נאך גאר אינטערסאנטע און סענזעציאלע אנטדעקונגען וואס וועלן בעז"ה באריכטעט ווערן בקרוב.

לויט ווי די עסקנים געבן איבער גרייט מען זיך צו פולשטענדיג רענאאווירן דער אוהל און דאס געהעריג אהערשטעלן בכבוד הראוי ווי עס פאסט פאר אזא מקום קדוש פאר אידן צו קומען מתפלל זיין ביים צדיק און פועל ישועות פאר כלל ישראל אויך א גאנץ יאר.

"ולבנימין אמר ידיד ה" ישכון לבטח עליו".