לאקאלע פאליציי און רעגירונג באאמטע פונעם קעטסקילס ראיאן ביי סוכות אויפנאמע אין אפסטעיט ניו יארק

א רייע הויכראנגיקע פאליציי אפיצירן און לאקאלע רעגירונג פירער פון איבער די קעטסקילס ראיאן האבן זיך פארזאמלט דורכאויס יו"ט סוכות אין די אפסטעיט רעזידענץ פונעם באקאנטן עסקן ר' אברהם (עיב) פרידמאן.

דער לאקאלער עסקן ר' אברהם ראזענבערג פון די 'דזשעי-סי-סי' (JCC) אין סאליוואן קאונטי האט זיך אנגעשלאסן מיט ר' אברהם פרידמאן ווארעם אויפצונעמען די פילע באאמטע. די צוזאמקום האט צוזאמגעברענגט די פילע פירער וועלכע ארבעטן כסדר האנט-אין-האנט מיט די פארשטייער פון די אידישע קאמיוניטי איבער פאבליק סעיפטי און אנדערע וויכטיגע געברויכן פאר די היימישע איינוואוינער איבער די גאנצע קעטסקילס ראיאן.

צווישן די אנוועזנדע ביי די אויפנאמע זענען געווען פארשטייער פון לאקאלע פאליציי דעפארטמענטס און רעגירונג אגענטורן פון סאליוואן און אראנדזש קאונטיס, ווי אויך אפיצירן פון די ניו יארק סטעיט פאליציי.

באזונדער האט זיך אנגעזען די אנוועזנהייט פון סאליוואן קאונטי שעריף מייקעל שיף, אראנדזש קאונטי שעריף פאול ארטעטא, סאליוואן קאונטי דיסטריקט אטוירני ברייען קאנאטי, אראנדזש קאונטי דיסטריקט אטוירני דעיוויד הואוולער, און דער מאנטיסעלא פאליציי טשיף דעיוויד לינדזי.