דראמא אין לופטפעלד:
42 חב"ד'סקע בחורים ארעסטירט ביים אנקומען קיין ארץ ישראל – 40 באפרייט נאך עטליכע שעה

סטראטעגישער פלאן פון די הצלה מגיוס אפיסעס אהיימצוברענגען די בחורים אינאיינעם אויפאיינמאל באקרוינט מיט הצלחה – וואכן פון צוגרייטונגען און פערזענליכע הדרכה האבן געהאלפן פארשנעלערן זייער באפרייאונג

א דראמאטישע געשיכטע האט זיך אפגעשפילט דינסטאג פארטאגס אין לוד לופטפעלד, ווען 42 חב"ד'סקע בחורים, וועלכע האבן זיך אויפגעהאלטן אין חו"ל די לעצטע צוויי יאר אין 770 קרוין הייטס זענען ארעסטירט געווארן ביים אנקומען קיין ארץ ישראל זייענדיג משתמטים פונעם צבא השמד. נאך עטליכע שעה זענען 40 פון זיי באפרייט געווארן, בעת צוויי בחורים זענען אריבערגעפירט געווארן צום מיליטערישן טורמע.

די געשיכטע קומט נאך חדשים פון אינטענסיווע ארבעט דורך די הצלה מגיוס אפיסעס, וועלכע האבן אין די לעצטע חדשים באזוכט אין חב"ד'סקע ישיבות און צוגעשטעלט הדרכה פאר הונדערטער בחורים. צווישן אנדערע איז פארגאנגענעם כ"ו אב אפגעהאלטן געווארן א גרויסער הדרכה שיעור אין 770 קרוין הייטס, פאר קרוב צו הונדערט בחורים וועלכע האבן זיך געגרייט אהיימצופארן.

אין די נאכפאלגענדע וואכן האבן די עסקנים פערזענליך באגלייט די בחורים און זייערע עלטערן, און אויסגעארבעט א סטראטעגישן פלאן אז די בחורים זאלן אהיימקומען אינאיינעם, כדי צו פארגרעסערן דעם דרוק אויפ'ן מיליטער און זיי זאלן מורא האבן פון איבריגע קאפ וויי  און פון די אנדערע זייט פארגרינגערן זייער מצב אין פאל פון אויב מ'ארעסטירט זיי.

דינסטאג פארטאגס, באלד נאכ'ן לאנדן, זענען די בחורים אריינגעפירט געווארן אין א זייטיגן צימער אינעם לופטפעלד און שפעטער זענען זיי אפגעפירט געווארן געווארן קיין תל-השומר. אויפ'ן פלאץ האבן אפגעווארט א גרעסערע צאל פון חברים און משפחה וואס האבן געוואלט כאטש כאפן א בליק אויף זייער משפחה,  די הצלה מגיוס מיטארבעטער, וועלכע האבן שוין אפגעווארט די בחורים אינעם לופטפעלד האבן געגעבן די פאסיגע הילף און הדרכה פאר די משפחה, די עסקנים האבן תיכף אריינגעשיקט אין בקו"ם-תל-השומר א געניטע אדוואקאט צו פארשנעלערן די באפרייאונג.

טראץ שטארקע דרוק וואס די מיליטערישע באאמטע האבן פרובירט צו לייגן אויף די בחורים, זענען זיי געבליבן פעסט לויט די הדרכה וואס זיי האבן באקומען ווען קיינער האט זיך בס"ד נישט געבראכן צו זייערע סטראשערייען און צוזאגען. נאך געציילטע שעה זענען 40 בחורים באפרייט געווארן, בעת צוויי בחורים, וועלכע ווערן שוין א לענגערע צייט פאררעכנט אלס משתמטים, זענען אריבערגעפירט געווארן צום מיליטערישן טורמע און ווארטן אויף זייער משפט. די עסקנים ארבעטן ווייטער אויף זייער באפרייאונג.

אין די טעג דערנאך איז אין די הצלה מגיוס אפיסעס, אפגעהאלטן געווארן עטליכע הדרכה שיעורים פאר די בחורים, דורך די שר ההצלה ר' בנימין טעפ, כדי זיי ווייטער צו באגלייטן ביז צו זייער פולשטענדיגער הצלה.

די געשיכטע צייכנט אפ א געוואלדיגע סוקסעס ווען נאך גאנצעטע חדשים פלאנירונגען און הדרכות זענען די בחורים אנגעקומען אהיים נאך אינעם זעלבן טאג און בס"ד וועלן זיי גענצליך באפרייט ווערן מצפרני הרשעים.