בס"ד

היסטארישע דעפלאוימענט קומט צו אן ענדע: די 'יו. עס. עס. עיברעהעם לינקאלן' קריגס-שיף קערט זיך אום אהיים נאך 321 טעג אויפן וואסער

די ריזיגע אמעריקאנער עירקרעפט קעריער, די "יו. עס. עס. עיברעהעם לינקאלן", איז דעם 8'טן אקטאבער אריינגעפארן אין די סאן דיעגא בעי, און דערמיט געברענגט צו אן ענדע א גאר שווערע און לאנגע 321-טאגיגע דעפלאוימענט. דאס איז געווען איינע פון די לענגסטע און מערסט אינטענסיווע קאמף-טורס פאר אן אמעריקאנער קריגס-שיף זינט די וויעטנאם קריג.

פאר א רעקארד פון 265 נאכאנאנדיגע טעג אויפן אקעאן, אן אפשטעלן אין קיין איין פארט, האט די לינקאלן און איר סטרייק גרופע דורכגעפירט קרוב צו 3,700 קאמפס מיסיעס אלס א טייל פון די "עפיק פיורי" אפעראציע. דורכאויס די אנגייענדע אמעריקע-מדינת ישראל מלחמה קעגן איראן, האבן זיי ארויסגעשאסן ארום 450 טאמאהאק מיסילס, און האבן באוויזן צו זינקען צענדליגע איראנער נעיווי שיפן.

טויזנטער פאמיליע מיטגלידער האבן איבערגעפילט דעם פארט אפצוווארטן די זעלנער וואס זענען געשטאנען אויסגעשורה'ט אין זייערע ווייסע יוניפארמס, אריינגערעכנט אסאך וואס האבן צום ערשטן מאל געזען זייערע ניי-געבוירענע בעביס וואס זענען געבוירן געווארן דורכאויס די לאנגע צייט וואס זיי זענען געווען אוועק. א טאג בעפאר די שיף איז אנגעקומען, איז דער דעפענס סעקרעטערי, פיט העגסעט, ספעציעל ארויסגעפלאגן צו די שיף פערזענליך צו באלוינען די מאנשאפט מיט א "פרעזידענטשעל יוניט סייטעישאן" - איינע פון די העכסטע מיליטערישע אויסצייכענונגען פאר אויסערגעווענליכע קאמף פערפארמענס.

די פרייליכע אהיימקומען קומט נאך חדשים פון קריטיק און זארג איבער די שווערע אומשטענדן אויף די לינקאלן שיף. געזעצגעבער און פאמיליעס האבן געשלאגן אלארם איבער מאנגל אין עסן, פראבלעמען מיט די פלאמינג, און די גייסטישע געזונט פון די זעלנער דורכאויס די לאנגע צייט אויפן וואסער - כאטש די נעיווי און פענטאגאן באאמטע האבן אוועקגעמאכט די באשולדיגונגען אלס איבערגעטריבן אדער פאלש.

די הילף איז ענדליך אנגעקומען אין אויגוסט ווען די "יו. עס. עס. דזשארדזש וואשינגטאן" קריגס-שיף, וואס איז געווענליך סטאנציאנירט אין אזיע, איז אנגעקומען קיין מיטל מזרח איבערצונעמען די וואך, וואס האט ערמעגליכט פאר די לינקאלן אנצוהייבן די לאנגע רייזע אהיים.

פאר די זעלנער וואס זענען יעצט פאראייניגט געווארן מיט זייערע פאמיליעס, רעפרעזענטירט די דעפלאוימענט סיי א היסטארישע מיליטערישע דערגרייכונג און סיי א שווערע פערזענליכע פרייז. די נעיווי זאגט אז זיי קוקן איבער די פראצעדורן צו זען ווי אזוי מען קען פארמיידן אין די צוקונפט אז זעלנער זאלן דארפן זיין אוועק פון אינדערהיים פאר אזא לאנגע צייט-אפשניט.