דראמא אין די לופטן: פאסאזשירן ראטעווען פליגער נאכדעם וואס קא-פילאט שטעכט דעם קעפטן און פרובירט צו קראכן דעם פליגער


נייע פלייט דאטא צייגט א שוידערליכע בילד פון וואס עס האט זיך אפגעשפילט אויף א 'פליי-דובאי' באאינג 737 מעקס פליגער, וועלכע איז געווען אויפ'ן וועג פון דובאי קיין תל אביב מיט ארום 150 פאסאזשירן דערויף. דער פליגער איז דראסטיש געפאלן פון 34,000 פיס צו 14,000 פיס אין א קורצע צייט-אפשניט פון בלויז 30 סעקונדעס, בעת די קרו האט ארויסגעשיקט אן עמערדזשענסי סיגנאל.


דער פליגער האט קודם ארויסגעשיקט אן אלגעמיינע עמערדזשענסי קאד, און עטליכע מינוט שפעטער האבן זיי עס געטוישט צו '7500', וואס איז דער אינטערנאציאנאלער סיגנאל פאר א היידזשעקינג אדער אומלעגאלע איבערנעמונג. ביל העמער פון פאקס ניוז האט אראפגעלייגט דעם טיימליין, ארויסברענגענדיג ווי שנעל די סיטואציע אינעם קאקפיט האט זיך פארוואנדלט אין א קאשמאר.


פאסאזשירן און 'אף-דוטי' קרו מעמבערס האבן שפעטער איבערגעגעבן א פחד'דיגע שילדערונג פון א ברוטאלע געשלעג וואס האט אויסגעבראכן, ווען דער קא-פילאט האט לויט באריכטן געשטאכן דעם הויפט קעפטן אין א קלארע פארזוך צו קראכן דעם פליגער. די מענטשן אויפ'ן פליגער האבן באוויזן איינצוברעכן אינעם קאקפיט, איבערגענומען דעם אטאקירער, און געהאלפן צוריקברענגען קאנטראל אויפ'ן פליגער. דער פליגער האט זיך עווענטועל אריבערגעכאפט און געלאנדעט בדרך נס אין טאבוק, סאודי אראביע.


אלע פאסאזשירן זענען אפגעקומען מיט שרעק נאך די עמערדזשענסי לאנדונג, און קיין ערנסטע וואונדן זענען נישט באריכטעט געווארן צווישן די רייזנדע, וואס אסאך פון זיי זענען געווען מדינת ישראל בירגער. מדינת ישראל פייטער דזשעטס זענען תיכף ארויסגעשיקט געווארן ווען דער היידזשעק סיגנאל איז ארויפגעקומען, אבער זענען צוריקגערופן געווארן איינמאל מען האט צוריק באקומען קאנטאקט מיטן פליגער.


אויספארשער פירן ווייטער אן אן אינטענסיווע אויספארשונג איבער די גענויע קייט פון געשעענישן וואס האט געפירט צו דעם פלוצלינגדיגן פאלן פונעם פליגער און די דאפלטע עמערדזשענסי קאדס. ווידעא קליפס און עדות'שאפטן פון די פאסאזשירן אינעם קעבין האבן געצייגט כאאטישע סצענעס מיט בלוט אויפ'ן פלאר בעת מען האט באוויזן צו נייטראליזירן די געפאר. זיכערהייט אגענטורן באהאנדלען דעם אינצידענט אלס א דירעקטע טעראר פארזוך צו צילן דעם פליגער. די נייע פלייט דאטא גיט יעצט דאס קלארסטע בילד ווי נאנט דער פליגער איז געווען צו א טראגעדיע, בעפאר די העלדישע פאסאזשירן און קרו האבן צוריקגענומען קאנטראל.