בס"ד

שוידערליכע ווידעא צייגט די צוקונפט פון מלחמות: באוואפנטע 'ראבאט הינט' און דראונס פירן דעם פראנט


א שוידערליכע בליק אין די צוקונפט פון מלחמות פארשפרייט זיך יעצט אויפן אינטערנעט, וואו מען זעט ווי 'ראבאט הינט' באוואפנט מיט רייפלס און דראונס שטורעמען אריין אין רויך-אנגעפילטע געביידעס. די ווידעא איז רעקארדירט געווארן ביי א סימולירטע שטאטישע שלאכט וואס איז אהערגעשטעלט געווארן דורך די כינעזער פירמע 'שאנדאנג לינגזשי אינטעלידזשענט עקוויפמענט'.


אין די קליפ קען מען זען ווי די מעכאנישע ראבאטן גייען אריין ערשט אין די צימערן און קארידארן, אויסצורוימען דעם וועג בעפאר די באוואפנטע סאלדאטן קומען אריין אונטער זיי. די טאקטיק איז געצילט צו האלטן מענטשליכע סאלדאטן אינדרויסן פון די ערגסטע סכנה זאנעס. די כינעזער מיליטער האט שוין אריינגענומען ענליכע ראבאט הינט - באוואפנט מיט רייפלס און מיסילס - אין זייערע אייגענע איבונגען, וואו זיי ווערן געטעסט פאר שפיאנאזש, פייער שטיצע, און אפילו דירעקטע אטאקעס וואס זענען ביז יעצט געווען רעזערווירט בלויז פאר מענטשן. דאס איז א טייל פון א שנעל-וואקסנדע גלאבאלע טויש, וואו מען ערווארט מער און מער אז מאשינען זאלן כאפן דעם ערשטן קלאפ כדי מענטשן זאלן נישט דארפן.


דער טרענד איז פונקט אזוי קענטיג אויף די שלאכטפעלדער אין אוקריינע, וואו אומבאמאנטע ערד-פארמיטלען האבן שוין דורכגעפירט מער ווי 100,000 מיסיעס ביז אנהייב זומער 2026. די ראבאטן ווערן באנוצט צו שלעפן אמוניציע, עסן און וואסער, ווי אויך ארויסצושלעפן פארוואונדעטע סאלדאטן פון סכנה זאנעס, וואס אן זיי וואלט עס געקאסט פיל מער לעבנס.


טייל פון די ערד ראבאטן ווערן אפילו אריינגעשטופט אין לימיטירטע פראנטליין קאמבאט ראלעס, א צייכן אז די גרעניץ צווישן סופארט עקוויפמענט און אקטיווע קעמפער הייבט אן ווערן פארשוואומען. דאך, טראץ די דראמאטישע בילדער און די הויכע צאל מיסיעס, בלייבן די ראבאטן אין די יעצטיגע קאנפליקטן מערסטנס באגרעניצט צו סופארט און ספעציפישע אויפגאבעס, אנשטאט צו פירן גרויסע שלאכטן אינגאנצן אויף זייער אייגענע האנט. דערווייל זענען עס טאקע די מאשינען וואס גייען אריין ערשט אין די פייער, אבער עס זענען נאך אלץ די מענטשליכע באשלוסן און מענטשליכע סאלדאטן וואס פירן דעם קאמף פון אונטער די קוליסן.