קריגס סעקרעטאר פיט העגסעט רייסט אויף דעם עולם אויפ'ן 'אברהם לינקאלן' שיף מיט שארפן וויץ איבער די איראנער נעיווי

קריגס סעקרעטאר פיט העגסעט האט ארויסגערופן הילכיגע אפלאדיסמענטן און געלעכטער ביי די זעלנער אויפ'ן 'יו-עס-עס אברהם לינקאלן' קריגס-שיף, ווען ער האט געגעבן א שארפע און אומפארגעסליכע פראזע פאר די מאטראסן וועלכע האבן נארוואס געענדיגט א היסטארישע מיסיע.

"מיר האבן באשלאסן זיך צו טיילן מיטן אקעאן אינאיינעם מיט די איראנער נעיווי," האט העגסעט געזאגט פאר'ן עולם, מאכנדיג א קורצע פויזע בעפאר ער האט געלאנדעט דעם פאנטש-ליין: "זיי האבן באקומען די אונטערשטע העלפט."

די ווערטער האבן אויפגעריסן דעם עולם מיט א מורא'דיגע התלהבות פון די זעלנער אויפ'ן דעק, וועלכע האבן נארוואס פארברענגט איבער 300 טעג אויפ'ן ים צו שטיצן די קאמף-אפעראציעס קעגן איראן. העגסעט האט ווייטער דערמאנט די מאנשאפט פונקטליך וואס זיי האבן אויפגעטון, זאגנדיג קלאר אז זיי האבן געזינקען 59 איראנער שיפן, און אינגאנצן צובראכן וואס איז ביז לעצטנס געווען א מאדערנע און מעכטיגע נעיווי.

דער געהויבענער מאמענט איז פארגעקומען בעת העגסעט האט אפיציעל איבערגעגעבן פאר די 'יו-עס-עס אברהם לינקאלן סטרייק גרופע' דעם פרעסטיזשפולן 'פרעזידענטשעל יוניט סייטעישאן' - די העכסטע אויסצייכענונג וואס א מיליטערישע איינהייט קען נאר באקומען. דאס איז געקומען אלס אנערקענונג פאר וואס ער האט אנגערופן "אויסערגעווענליכע העראאיזם" קעגן די פיינטליכע קרעפטן דורכאויס די אפעראציע.

בעפאר די וויצן, האט העגסעט אויסגערעכנט אן אומגלויבליכע ליסטע פון די גרופע'ס אויפטוען. דאס רעכנט אריין טויזנטער קאמף-פליגער מיסיעס, צענדליגער טויזנטער שעה'ן פון קאמף-פליען, און ווייט איבער א מיליאן פונט פון באמבעס און אויפרייס-מאטעריאל וואס איז אראפגעווארפן געווארן אויף פיינטליכע צילן - און דאס אלעס אן קיין איין איינציגע עקסידענט מיט די פליגערס.

פאר די זעלנער וואס האבן פארברענגט כמעט א גאנץ יאר אוועק פון אינדערהיים זיך צו קעגנשטעלן א פיינטליכע נעיווי, איז די צערעמאניע געווען א גרויסע סעלעברעישאן און א פובליקע דערמאנונג אז זייער מיסיע האט גענצליך געטוישט דעם באלאנס פון קראפט אויפ'ן וואסער.