בס"ד

פרעזידענט טראמפ באדאנקט אילאן מאסק פאר זיין היסטארישע צוזאג צו טיילן 'ספעיס-עקס' שעירס פאר יעדע אמעריקאנער קינד

פרעזידענט טראמפ האט עפנטליך באדאנקט דעם ביליאנער אילאן מאסק פון זיין אפיס אינעם 'אוועל אפיס', פאר זיין צוזאג צו שענקען א 'ספעיס-עקס' (SpaceX) שעיר פאר יעדע איינציגסטע קינד אין אמעריקע. "ער גיבט איין שעיר פאר יעדע קינד, און עס גייט אדורך די 'טראמפ אקאונטס'," האט טראמפ געזאגט.

מאסק האט ארגינעל געמאלדן זיין פלאן אין א תגובה אויף זיין 'עקס' פלאטפארמע דעם פארגאנגענעם אקטאבער 19, וואו ער האט געשריבן אז ער וועט קומענדיגן יאר טיילן א שעיר פאר יעדע אמעריקאנער קינד. נעמענדיג אין באטראכט אז א ספעיס-עקס שעיר האלט יעצט ביי ארום 146 דאלאר, קומט אויס אז אזא מתנה פאר אלע קינדער אין לאנד וועט קאסטן פאר מאסק א געשאצטע 10 ביליאן דאלאר אדער מער.

דערווייל זענען נאך דא אסאך פרטים וואס זענען אומקלאר. מאסק אליינס האט נאכנישט ארויסגעגעבן קיין דעטאלן ווי אזוי די שעירס וועלן אנקומען צו די קינדער, און צי עס וועט טאקע גיין דורך די אזוי-גערופענע "טראמפ אקאונטס" - די נייע רעגירונג-געשטיצטע אינוועסטמענט אקאונטס פאר קינדער. דעריבער איז טראמפ'ס סטעיטמענט דערווייל בלויז זיין אייגענע ווערסיע פונעם פלאן.

דער פרעזידענט האט אויך צוגעגעבן אז קרוב צו 80 מיליאן מענטשן האבן שוין באקומען די אקאונטס און אז די נומערן "גייען ארויף זייער שנעל," כאטש אנדערע באריכטן שאצן די צאל אויף נענטער צו 70 מיליאן.

אויף די פראגע וואס עס וועט זיין מיט ערוואקסענע, האט טראמפ געענטפערט אז די באאמטע קוקן אריין אין "עפעס אנדערש" פאר זיי, וואס וועט זיין א באזונדערע פראגראם פון די קינדער אקאונטס, אבער ער האט נישט איבערגעגעבן קיין שום דעטאלן. צי עס וועט למעשה זיין אן ענליכע פראגראם פאר ערוואקסענע, און פון וואו די פאנדן וועלן קומען דערפאר, בלייבט דערווייל אן אפענע פראגע.