ספעקטאקולערע "ספעיס דזשעליפיש" ערשיינונג אין די הימלען העכער כינע נאך א ראקעט ארויסשיס

א ריזיגע שיינענדיגע "דזשעליפיש" האט זיך באוויזן אין די הימלען העכער כינע דעם 23'סטן אקטאבער 2026, נאכדעם וואס די כינעזער רעגירונג האט ארויסגעשאסן א 'לאנג מארטש-6A' ראקעט פונעם טייואן סעטעלייט לאנטש צענטער.

ווידעא קליפס וואס זענען געכאפט געווארן פון א פליגער צייגן א העלע, רינדיגע ליכטיגקייט וואס ווערט גרעסער אין די נאכט הימל, מיט א געדרייטע רויך-שפור וואס ציט זיך אונטער דעם. די ספעקטאקולערע סצענע איז געזען געווארן איבער גאנץ צפון כינע.

דער ארויסשיס האט אריינגעשטעלט דעם 'יאַאגאַן-50 03' (Yaogan-50 03) סעטעלייט אין אָרביט. די סארט סעטעלייטס ווערן אנגערופן "רימאוט סענסינג" סעטעלייטס, און טרעקינג סייטס צייגן אן אז עס רעדט זיך פון א מיליטערישע סעטעלייט, כאטש איר פונקטליכע ציל איז קיינמאל נישט פובליצירט געווארן.

עקספערטן ערקלערן אז די אזוי-גערופענע "ספעיס דזשעליפיש" איז נישט קיין יואעפא (UFO) אדער עפעס אן אומנאטורליכע ערשיינונג, נאר א באקאנטע עפעקט וואס פאסירט ווען מען שיסט ארויס ראקעטן ביינאכט אדער פארנאכטס.

הויך אין די אטמאספערע שיינט נאך די זון, און דאס באלייכט די וואסער-דאמף און רויך וואס קומט ארויס פונעם ראקעט, בעת אויף דער ערד איז שוין טונקל. וויבאלד די לופט איז זייער דין אין יענע הויכקייטן, שפרייט זיך די רויך אויס אין א רינדיגע פארעם, און די שטארקע ווינטן דארט דרייען די שפורן אז עס זאל אויסזען ווי די פיסלעך פון א דזשעליפיש.

דער ארויסשיס איז טאקע געווען פלאנירט אויף ארום פארנאכטס צייט, וואס איז די פאסיגע צייט פאר אזא סארט ליכטיגקייט. כאטש די סצענע קוקט אויס גאר דראמאטיש, איז עס אינגאנצן אומשעדליך און איז בלויז א רעזולטאט פון ליכטיגקייט און די ריכטיגע טיימינג.