נייע סענא אנקעטע: גאווערנאר האוקעל ציט ווייטער פאראויס פון רעפובליקאנער קאנדידאט ברוס בלעיקמאן בלויז טעג בעפאר די וואלן

ווייניגער ווי א וואך בעפאר 'עלעקשאן דעי', צייגט א נייע 'סענא' אנקעטע צווישן ניו יארקע וואוטערס אז די דעמאקראטישע גאווערנאר קעטי האוקעל רוקט זיך אלס מער פאראויס פון איר רעפובליקאנער קעגנער, נאסאו קאונטי עקזעקיוטיוו ברוס בלעיקמאן. לויט די נייע נומערן האלט האוקעל ביי 54 פראצענט קעגן בלעיקמאן'ס 40 פראצענט. דאס איז א 14-פוינט ריס, א שיינע שפרונג פון איר 50-41 פראצענט אויבערהאנט וואס זי האט געהאט אין סעפטעמבער.

אירע פערזענליכע נומערן האבן זיך אויך שטארק פארבעסערט, ווען 51 פראצענט פון די וואוטערס קוקן איר אן פאזיטיוו, און 51 פראצענט זענען צופרידן פון איר ארבעט. דער סענא פאולסטער סטיווען גרינבערג האט אנגעוויזן אז דאס איז די ערשטע מאל אין אירע פינף יאר אלס גאווערנאר וואס איר 'פעיוארעבל' ראטע גרייכט צו 50 פראצענט. די וויילער זענען אויך איבערוויגנד ביי דער מיינונג אז זי גייט געווינען, מיט 68 פראצענט וואס זאגן אזוי, אין פארגלייך צו בלויז 23 פראצענט וואס גלייבן אז בלעיקמאן וועט ארויסקומען דער זיגער.

האוקעל איז נישט די איינציגסטע דעמאקראט וואס מאכט פארשריט איבערן סטעיט. אטורני דזשענעראל לעטישע דזשעימס פירט קעגן איר רעפובליקאנער קעגנער מיט 54 קעגן 39 פראצענט, און קאמפטראלער טאמעס דינאפאלי פירט קעגן זיין רעפובליקאנער אפאנענט מיט 59 קעגן 32 פראצענט. ביידע האבן זיך אביסל געהויבן זינט די פריערדיגע אנקעטעס אין סעפטעמבער.

פונדעסטוועגן איז די אנקעטע נישט קיין ריין גוטע נייעס פאר האוקעל. די נומערן צייגן אז זי און בלעיקמאן זענען בערך אייניג אין די אפסטעיט ראיאנען און אין די סובורבס ארום ניו יארק סיטי. איר גאנצע אויבערהאנט איז אנגעוויזן אויף ניו יארק סיטי און אן 11-פוינט פאראויס-רוק צווישן אומאפהענגיגע (אינדעפענדענט) וואוטערס. דערצו זאגן ארום 49 פראצענט וויילער אז די סטעיט גייט אין די אומרעכטע ריכטונג. ווי באקאנט איז א פאול בלויז א בילד פון די יעצטיגע מינוט און נישט קיין נבואה, דעריבער בלייבט די גרויסע פראגע צי בלעיקמאן וועט קענען פארשמעלערן דעם ריס אין די לעצטע עטליכע טעג צו די וואלן.