בס"ד

פרישע אנקעטעס צייגן: דעמאקראטן רוקן זיך פאראויס אין קריטישע פארמעסטן בלויז טעג בעפאר די מידטורם וואלן


לויט די לעצטע פאולס און די ענדגילטיגע "פאקס ניוז פאווער רענקינגס", זעט אויס אז די דעמאקראטן מאכן פארשריט אין עטליכע קריטישע פארמעסטן, בלויז געציילטע טעג בעפאר די מידטורם וואלן. פאקס ניוז האט גערוקט דריי סענאט פארמעסטן לטובת די דעמאקראטן: אהייא איז געטוישט געווארן פון א "טאס-אפ" (אומקלארער פארמעסט) צו "נויגט דעמאקראטיש", סאוט קאראליינע פון "ווארשיינליך רעפובליקאנער" צו "נויגט רעפובליקאנער", און מיסיסיפי פון "זיכער רעפובליקאנער" צו "ווארשיינליך רעפובליקאנער".


אין אהייא צייגט א נייע "סאפאלק יוניווערסיטי / יו-עס-עי טודעי" אנקעטע אז דער געוועזענער דעמאקראטישער סענאטאר שעראד בראון פירט איבער דעם רעפובליקאנער סענאטאר דזשאן יוסטעד מיט 47 קעגן 44 פראצענט, וואס דאס איז נאך אלץ אינעם "מארדזשין אוו עראר". אין צוגאב האט פאקס אויך גערוקט דעם אהייא גאווערנאר פארמעסט צו "נויגט דעמאקראטיש".


אינגאנצן, שאצט פאקס ניוז אז די דעמאקראטן זענען פאראויס אין 48 סענאט זיצן און די רעפובליקאנער אין 47. דאס לאזט ביידע פארטייען אן קיין מאיאריטעט, וואס מאכט דעם קאנטראל פונעם סענאט פאר א פולשטענדיגן "טאס-אפ". אין די קאנגרעס הויז, צייגן די רענקינגס ווייטער אז די דעמאקראטן וועלן ווארשיינליך איבערנעמען דעם קאנטראל, האבנדיג די אויבערהאנט מיט כאטש 223 זיצן.


טראמפ אויפן קאמפיין טרעיל

דערווייל גייט פרעזידענט טראמפ אן מיט זיין קאמפיין אפענסיווע ארויסצוהעלפן רעפובליקאנער קאנדידאטן, און ער איז יעצט אויפן וועג קיין אהייא נאכן אפהאלטן ריזיגע ראליס אין טעקסאס. זיין פאקוס אויף סטעיטס וואס ער האט געוואונען אין 2024 צייגט ווי שטארק דער קאמף אויפן סענאט קומט פאר אין טראדיציאנאלע רעפובליקאנער טעריטאריעס.


דאך איז פארהאן סיבות פארוואס מען דארף זיין פאָרזיכטיג מיט די פאולס. א דורכשניט פון ארום 10 פראצענט וויילער אין אלאסקא, אייאווע און קענזעס זאגן אז זיי האבן נאך נישט באשלאסן פאר וועמען צו שטימען, און די היסטאריע האט שוין געוויזן אז די אנקעטעס האבן אפטמאל אונטערגעשאצט די רעפובליקאנער כוחות. די גרויסע פראגע בלייבט יעצט צי די לעצט-מינוטיגע רוקונגען אין די אנקעטעס און רענקינגס וועלן זיך טאקע איבערזעצן אין פאקטישע שטימען ביים טאג פון די וואלן, נאוועמבער דעם 3'טן.