בס"ד

אמעריקאנער עקאנאמיע וואקסט מיט 3.4% אינעם דריטן קווארטאל פון 2026, איבערשטייגנדיג אלע ערווארטונגען


די אמעריקאנער עקאנאמיע האט זיך פארברייטערט מיט א יערליכע ראטע פון 3.4 פראצענט אינעם דריטן קווארטאל פון יאר 2026, א שיינע העכערונג פונעם פריערדיגן קווארטאל ווען עס איז געשטיגן מיט בלויז 2.2 פראצענט. די פרישע ציפערן האבן איבערגעשטיגן די ערווארטונגען פון די עקאנאמיסטן, לויט א פרימילינארע שאצונג וואס איז ארויסגעגעבן געווארן דורך די אמעריקאנער 'ביורא אוו עקאנאמיק אנאליזעס' דעם 29'סטן אקטאבער.


די נייע דאטא צייגט דעם שטערקסטן קווארטאל-וואוקס אין א יאר צייט. דאס קומט א דאנק שטארקע ביזנעס אינוועסטמענטס, א נאכאנאנדע פארמערונג אין קאנסומער ספענדינג (דאס געלט וואס קאנסומערס געבן אויס), און א געהעכערטע רעגירונג ספענדינג. קאנסומער ספענדינג איז געשטיגן מיט א יערליכע ראטע פון 3.8 פראצענט, וואס צייגט אז טראץ די פינאנציעלע דרוק וואס פילע אמעריקאנער מאכן מיט, האלטן זיי ווייטער אן צו שטיצן די עקאנאמישע אקטיוויטעטן. אויך ביזנעס אינוועסטמענטס האבן געזען א שטארקע רוק פאראויס, הויפטזעכטליך אין טעכנאלאגיע און עקוויפמענט, אינאיינעם מיט א ברייטערע כוואליע פון אינוועסטמענטס ארום 'ארטיפישעל אינטעלידזשענס' (AI).


אינפלאציע לאזט נאך

א וויכטיגע פונקט אינעם באריכט איז די אינפלאציע ציפערן. דער 'PCE' פרייז אינדעקס, א הויפט אינפלאציע מאס וואס ווערט נאענט נאכגעפאלגט דורך די פעדערעל ריזערוו, איז געשטיגן מיט א יערליכע ראטע פון 2.1 פראצענט דורכאויס דעם קווארטאל - א דראסטישע נידערונג פון די 5 פראצענט אינעם צווייטן קווארטאל. די 'קאור PCE' אינפלאציע, וואס רעכנט נישט אריין שפייז און ענערגיע פרייזן, איז געפאלן צו 2.5 פראצענט פון 3.3 פראצענט. דאס צייגט אז די פרייז דרוק האט נאכגעלאזט, אפילו בשעת די עקאנאמיע האט זיך פארברייטערט.


טשעלענדזשעס אונטער די קוליסן

טראץ די פאזיטיווע נייעס און די שטארקע מאמענטום, צייגט דער באריכט אויך אויף עטלעכע טשעלענדזשעס אונטער די קוליסן. א שוואכערע עקספארט און א העכערונג אין אימפארטס האבן טיילווייז אפגעשוואכט די געווינסן פון די לאקאלע עקאנאמישע אקטיוויטעטן. דערצו ברענגען די הויכע ענערגיע פרייזן און אינטערנאציאנאלע אנגעצויגנקייטן אן אומזיכערקייט פאר ביזנעסער און קאנסומערס.


די קאמבינאציע פון א שנעלערע עקאנאמישע וואוקס און א שוואכערע אינפלאציע גיט א גוטע בילד אויף די אמעריקאנער עקאנאמיע, אבער די העכערע ענערגיע קאסטן, א שוואכקייט אינעם האוזינג מארקעט, און די אומזיכערקייט איבער צוקונפטיגע האנדלס-באדינגונגען בלייבן אלס מעגליכע פראבלעמען אין די קומענדיגע מאנאטן. די יעצטיגע ציפערן זענען דערווייל בלויז פרימילינאר און קענען נאך ווערן איבערגעמאכט ווען מער פולשטענדיגע דאטא וועט ווערן פובליצירט.