בס"ד

מאסיווע פייער ברעכט אויס אין א הויפט מעדיצינישע פאבריק אין טעהראן, איראן


א מאסיווע פייער האט אויסגעבראכן דאנערשטאג, אקטאבער 29, אין אן אינדוסטריעלע געביידע נעבן די 'קאראדזש ספעשעל ראוד' אין מערב טעהראן, איראן, וואס האט ארויפגעשיקט שווארצע געדעכטע רויך וואלקענעס הויך אין די לופטן איבער די גאנצע ארומיגע געגנט.


אין ווידעא קליפס וואס זענען פארשפרייט געווארן אויף די סאציאלע מידיא, קען מען זען ווי ריזיגע פלאמען רייסן ארויס פון דעם קאמפלעקס, בעת קארס פארן רואיג ווייטער אויף די דערנעבנדיגע הייוועי, וואס גיט א דראמאטישע בילד פונעם פייער. באריכטן געבן אן אז די פייער האט פאסירט ביי קילאמעטער 11 אויף די קאראדזש הייוועי, און די פאבריק באלאנגט פאר 'טעהראן דארו' (Tehran Daru), אויך באקאנט אלס 'טעהראן פארמא', וואס איז א הויפט פאַרמאַסוטיקאַל קאמפאני אין איראן וואס פראדוצירט מעדיצינען.


די פייער האט זיך אנגעהויבן ארום 4 אזייגער נאכמיטאג לאקאלע צייט. פייערלעשער זענען באלד אראפגערופן געווארן צום סצענע צו קעמפן מיט די פלאמען וואס האבן געצויגן אויפמערקזאמקייט פון די גאנצע אומגעגנט.


דערווייל האבן די ארטיגע אויטאריטעטן נאכנישט אפיציעל באשטעטיגט וואס עס האט פאראורזאכט דעם פייער, ווי גרויס די שאדנס זענען, אדער צי עס זענען דא פארוואונדעטע אדער טויטע. וויבאלד עס האנדלט זיך פון א וויכטיגע פאבריק וואס פראדוצירט און טיילט איין מעדיצינען, לייגט עס צו א באזונדערע וויכטיגקייט צום אינצידענט. עס איז אבער נאכנישט קלאר צי די פייער האט געשעדיגט די פראדוקציע ליניעס, די מאטעריאלן וואס זענען דארט סטארידזשד, אדער די אלגעמיינע אפעראציעס פון די קאמפאני.


עס איז אויך נישט דא קיין שום באשטעטיגטע באווייזן אז די פייער איז געווען א רעזולטאט פון אן אטאקע, סאבאטאזש, אדער אן אנדערע בייזוויליגע אקט. מען ווארט אויף מער אינפארמאציע פון די עמערדזשענסי אגענטורן און איראנער אויטאריטעטן צו קענען פעסטשטעלן דעם פולן פארנעם פונעם אינצידענט און קלאר מאכן וואס פונקטליך עס האט דארט פאסירט.