בס"ד

פיליפינען: 'מאיאן' וואולקאן ברעכט אויס מיט א מאכטפולן אויפרייס; אלארם שטאפל געהויבן צו לעוועל 3


דער 'מאיאן' וואולקאן אין אלביי, פיליפינען, האט ווידער דערמאנט פאר יעדן ווער עס איז בעל הבית, ווען ער האט אנגעהויבן שפייען פייער און אש. אום אקטאבער 30, 2026, 11:53 פארמיטאג, האט דער וואולקאן אויסגעבראכן מיט א מעסיגע אויפרייס, ארויסשיסנדיג א דיקע וואלקן פון אש ארום 3 קילאמעטער הויך אין די לופטן.


הגם דער אויפרייס האט אנגעהאלטן בלויז ארום זעקס מינוט, איז עס געווען גענוג אז די ארטיגע 'פיוואלקס' (PHIVOLCS) אגענטור זאל הייבן דעם אלארם שטאפל פון לעוועל 2 צו לעוועל 3, אויף זייער סקעיל פון 0 ביז 5. דאס איז נישט דאס ערשטע מאל וואס דער וואולקאן גרייכט דעם שטאפל; ער איז שוין געווען אויף לעוועל 3 פאר עטליכע מאנאטן אנהייב יאר בעפאר ער האט זיך אביסל בארואיגט. יעצט איז ער צוריק אין קראפט, מיט א ריזיגע אש-וואלקן וואס מ'קען זען איבער די גאנצע פראווינץ.


דער אש-וואלקן האט זיך גערוקט אין די מערב-דרום-מערב ריכטונג, און די אויטאריטעטן ערווארטן אז א רעגן פון אש וועט פאלן אין די ארומיגע שטעט ווי דאראגא, קאמאליג, גוינאבאטאן, און אנדערע מוניציפאליטעטן אין אלביי. איינוואוינער זענען דרינגנד געווארנט געווארן צו עוואקואירן די 6-קילאמעטער "פערמאנענטע געפאר זאנע" ארום דעם קראטער, וואו אריינגיין איז שטרענג פארבאטן.


א לעוועל 3 אלארם באדייט אז עס איז דא א גרויסע מעגליכקייט פאר א געפארפולע אויסברוך, וואס מיינט אז פליסיגע לאווא און 'פייראקלאסטישע' שטראמען (שנעל-פליסנדיגע לאווינעס פון הייסע גאזן און וואולקאנישע ברוכווארג) קענען אראפקומען די בערג אין די קומענדיגע טעג אדער וואכן. צוליב די גרויסע סכנה פון די הייסע שטראמען, איז די געפאר זאנע אזוי קריטיש וויכטיג.


יעדער וואס וואוינט אין די געגנט פונעם וואולקאן ווערט געבעטן צו פאלגן די אנווייזונגען פון די לאקאלע רעגירונג און די 'פיוואלקס' אגענטור, און האלטן גרייט פנים-מאסקעס און עמערדזשענסי סופלייס אין פאל עס הייבט אן פאלן אש.