בס"ד

שפילן מיט פייער: א וויירעל ווידעא צייגט ווי א גרופע מענטשן ווארפן א לעבעדיגע האנט-גראנאט אין וואסער


א ווידעא וואס פארט ארום אנליין צייגט א גרופע מענטשן ווי זיי שלעפן ארויס דעם פין פון א האנט-גראנאט, ווארפן עס אריין אין וואסער, און כאפן א קליפ פונעם מאמענט וואס עס רייסט אויף. זייער סיבה דערצו איז געווען בלויז פשוט'ע נייגעריגקייט, וויבאלד זיי האבן געוואלט זען ווי אזוי א גראנאט אויפרייס זעט אויס אונטערן וואסער.


די קליפ כאפט אויף דעם אויפרייס און די ווילדע רעאקציע פונעם וואסער, און עס איז פונקט די סארט ווידעא וואס לאזט די צושויער זיך וואונדערן ווי אזוי איינער קען בכלל טראכטן אז דאס איז א גוטע בייפאל. קיין דעטאלן איבער ווער די מענטשן זענען אדער וואו די קליפ איז רעקארדירט געווארן זענען נישט ארויסגעגעבן געווארן, און די פראגעס בלייבן דערווייל אפן.


עקספערטן ווארענען אבער אז די שפיל איז פיל מער געפארפול ווי עס זעט אויס. סייענס עקספערטן ווייזן אן אז אן אויפרייס אונטערן וואסער איז געווענליך פיל מער מסוכן פאר סיי ווער עס געפינט זיך אין די געגנט ווי דער זעלבער אויפרייס אויף דער יבשה. די סיבה דערצו איז, ווייל וואסער טראגט דעם 'שאק-וועיוו' (קראפט פונעם אויפרייס) מיט זייער ווייניג קעגנשטעל, וואס קען גורם זיין שווערע אינערליכע וואונדן, ספעציעל אין די טיילן פונעם קערפער וואס זענען אנגעפילט מיט לופט.


כאטש די שטיקלעך פונעם גראנאט ווערן שנעל אפגעשטעלט אינעם וואסער, קענען זיי אבער אויף דער יבשה פליען הונדערטער מעטער ווייט, און דאס איז די סיבה פארוואס טרענירטע סאלדאטן ווארפן עס און זוכן גלייך א שוץ. אין די פארגאנגענהייט האבן אנדערע וויירעל קליפס שוין געצייגט ווי גראנאטן רייסן אויף אין די אומריכטיגע מינוט, אריינגערעכנט א קליפ פון יאר 2012 וואו א גראנאט האט אויפגעריסן אינעם סעקונדע וואס עס האט אנגערירט דאס וואסער און האט אראפגעווארפן די ווארפערס פון די פיס.


א גראנאט וואס מען האט שוין ארויסגעצויגן דעם פין קען מער נישט צוריקגעשטעלט ווערן צו זיין זיכער, דעריבער איז די וויכטיגסטע לעקציע פון דעם: פראבירט דאס נישט נאכצומאכן אונטער קיין שום אומשטענדן!