מאסיווע אוקריינישע דראון אטאקע אויף רוסישע אויל רעפיינערי; רוסלאנד זאגט אז זי האט אראפגעשאסן איבער טויזנט דראונס



אוקריינא האט דורכגעפירט איינע פון די גרעסטע איבערנאכט דראון אטאקעס זינט די אנהייב פונעם קריג, ווען זיי האבן באטראפן די 'נאוואקויבישעווסק' אויל רעפיינערי אין די סאמארא ראיאן אין רוסלאנד, וואס האט פאראורזאכט כאטש 11 פייערן אינעם קאמפלעקס.


די רעפיינערי, וואס באלאנגט פאר די רוסישע ענערגיע ריז 'ראסנעפט', האט א יערליכע פראדוקציע קאפאציטעט פון ארום 8.8 מיליאן טאן און פראדוצירט פעטראל און אויל פראדוקטן, אריינגערעכנט ברענשטאף וואס ווערט באנוצט פאר עראפלאנען. ווידעאס און ערשטע באריכטן פונעם סצענע צייגן דעם גרויסן פארנעם פונעם שאדן, נאכדעם וואס די אוקריינישע דראונס האבן געצילט וויכטיגע רוסישע ענערגיע אינפראסטרוקטור.


לויט די באריכטן האבן זיי זיך באנוצט מיט 'FP-1' לאנג-שטרעקיגע דראונס, וואס צייגט אוקריינא'ס ווייטערדיגע באמיאונגען צו צילן פאסיליטיס וואס שטיצן די רוסישע מיליטערישע לאגיסטיק. די אטאקע אויף די רעפיינערי קומט אלס טייל פון א ברייטערע קאמפיין צו שטערן רוסלאנד'ס מעגליכקייט צו פראדוצירן און פארטיילן ברענשטאף.


אין די זעלבע צייט האט די רוסישע פארטיידיגונגס מיניסטעריום געמאלדן אז אירע עיר דעפענס סיסטעמען האבן איבערגעכאפט און אראפגעשאסן אן אומגלויבליכע צאל פון 1,043 אוקריינישע דראונס דורכאויס די נאכט אין 19 פארשידענע ראיאנען. דאס מאכט עס פאר איינע פון די גרעסטע איין-נאכט אטאקעס פונעם גאנצן קריג. די מאסיווע דראון אקטיוויטעטן האבן אויך געפירט צו צייטווייליגע לופטפעלד פארמאכונגען און רעסטריקציעס אויף פליגערס, אריינגערעכנט ביי עירפארטס אין מאסקווע און סאמארא.


די פרישע אטאקעס קומען קורץ נאכדעם וואס באריכטן האבן אנגעצייגט אז אוקריינא האט צייטווייליג רעדוצירט אירע אטאקעס אויף רוסישע אויל אינפראסטרוקטור, מעגליך צוליב דרוק פון וואשינגטאן. די באנייטע אטאקעס ברענגען ארויס די וויכטיגקייט פון ענערגיע פאסיליטיס אינעם ברייטערן קריג, בפרט ווען אוקריינא זוכט אונטערצוברענגען די ברענשטאף סופלייען וואס קענען ארויסהעלפן די רוסישע מיליטערישע אפעראציעס. דערווייל איז נאך אומקלאר די פונקטליכע פארנעם פונעם שאדן צו די רעפיינערי און ווי שטארק עס וועט אפעקטירן איר פראדוקציע קאפאציטעט.