פרעזידענט טראמפ: די קאמוניסטישע רעגירונג אין קובא קען פאלן "גאר בקרוב"


פרעזידענט דאנאלד טראמפ האט פאראויסגעזאגט אז די קאמוניסטישע רעגירונג אין קובא קען אונטערפאלן "גאר בקרוב", וואס דאס פארמערט די שפעקולאציעס איבער וואשינגטאן'ס קומענדיגע שריט קעגן דעם אינזל.


רעדנדיג צו רעפארטער אינעם ווייסן הויז דעם 9'טן נאוועמבער, האט טראמפ אראפגעמאלן קובא אלס א "דורכגעפאלענע לאנד" און קריטיקירט זייער קאמוניסטישע און סאציאליסטישע פאליטישע סיסטעם, און האט אפילו צוגעגליכן זייער אידעאלאגיע צו די דעמאקראטישע פארטיי. ער האט אויך צוגעגעבן אז די פאראייניגטע שטאטן וועט צושטעלן הומאניטארישע הילף פאר קובא, אנווייזנדיג אז דאס לאנד'ס פאליטישע צוקונפט קען זיך טוישן אין די נאענטע צוקונפט.


די קאמענטארן קומען נאך א סטעיטמענט פונעם 23'סטן אקטאבער, וואו טראמפ האט געזאגט אז וואשינגטאן וועט זיך נעמען איבער קובא נאכ'ן זיך ספראווען מיט איראן, און האט אנגעוויזן אז סעקרעטערי אוו סטעיט מארקא רוביא וועט שפילן א צענטראלע ראלע דערין. אינעם זעלבן טאג האט רוביא עפנטליך געמוטיגט קובאנער בירגער וואס זוכן א פאליטישע טויש, צו כאפן די געלעגנהייט דורך וואס ער האט אנגערופן א "דיסקרעטע שותפות מיט די סי-איי-עי" (CIA), וואס דאס האט געצויגן אינטערנאציאנאלע אויפמערקזאמקייט צו די סטראטעגיע פון די אדמיניסטראציע.


רוביא איז אויסגעפרעגט געווארן איבער די סי-איי-עי רוף בעת זיין באזוך אין פאריז פאר די 'G7' אויסערן מיניסטארן מיטינג דעם 9'טן נאוועמבער, אבער ער האט זיך אנטזאגט צו זאגן צי דער רוף האט שוין אריינגעברענגט רעזולטאטן. "איך וואלט אייך נישט געזאגט אויב איך האב באקומען סיי וועלכע רעזולטאטן פון די סי-איי-עי," האט ער געזאגט, צולייגנדיג אז ארויסגעבן אזעלכע אינפארמאציע קען אריינלייגן די פארמישטע פערזאנען אין א סכנה.


זיין ענטפער האט נישט באשטעטיגט און נישט געלייקנט צי קובאנער בירגער האבן זיך שוין פארבינדן מיט די אגענטור, און ער האט נישט איבערגעגעבן קיין שום דעטאלן איבער א מעגליכע קאאפעראציע. דאס לאזט אומפארענטפערט די פראגע צי דער פובליק רוף האט טאקע געברענגט שפיאנאזש קאנטאקטן, אדער צי עס איז בלויז א טייל פון וואשינגטאן'ס ברייטערע קאמפיין צו לייגן דרוק אויף האוואנא.


קובא פלאגט זיך ווייטער מיט ערנסטע עקאנאמישע קריזיסן, אריינגערעכנט א מאנגל אין ברענשטאף, פאוער אוטעדזשעס, און א מאנגל אין וויכטיגע געברויכן. אין די זעלבע צייט האט די ארטיגע רעגירונג אפגעווארפן דאס וואס זיי רופן אן אמעריקאנער אריינמישונג אין זייערע אינערליכע אנגעלעגנהייטן. כאטש טראמפ'ס פאראויסזאגונג האט פארשטארקט די אויפמערקזאמקייט אויפ'ן אינזל, איז דערווייל נאכנישט געמאלדן געווארן קיין באשטעטיגטע טויש אין די רעגירונג אדער א צייט-פלאן פאר א פאליטישע איבערגאנג.