בס"ד

כאאס אין די לופטן: טויזנטער פלייטס קענסעלד נאך אמעריקע-ברייטע פראבלעם; ווייסע הויז פארטיידיגט פרעזידענט טראמפ'ס רעאקציע


א באאמטער אינעם ווייסן הויז זאגט אז פרעזידענט טראמפ באקומט כסדר'דיגע אפדעיטס איבער די מאסיווע לופט-טראפיק קריזיס וואס האט באטראפן דאס לאנד, טראץ וואס דער פרעזידענט האט נאכנישט ארויסגעגעבן קיין שום פובליק סטעיטמענט דערוועגן. לויט א באריכט פון סי-ען-ען, ווערט נישט ערווארטעט אז דער פרעזידענט זאל רעדן צום פאלק דורכאויס די נאכט.


די שטילקייט פונעם פרעזידענט איז שטארק ארויסגעשטאנען צוליב די גרויסקייט פונעם כאאס: די 'עף-עי-עי' (FAA) האט פרייטאג נאכמיטאג פארארדנט א נאציאנאלע "גראונד סטאפ" נאכדעם וואס א קאמיוניקאציע פראבלעם האט באטראפן די לופט-טראפיק קאנטראל צענטערן, אפשטעלנדיג אלע ארויסגייענדע פלייטס איבער'ן גאנצן לאנד פאר מער ווי פיר שעה. ביז די פארארדענונג איז געווארן אויפגעהויבן אין די אוונט שטונדן, זענען שוין טויזנטער פלייטס געווארן געקענסעלט און פאסאזשירן זענען געבליבן געשטראנדעט אין עירפארטס איבער אמעריקע.


באאמטע אין די אדמיניסטראציע האבן אפגעווארפן די קריטיק אז דער פרעזידענט איז נישט אינוואלווד. היימלאנד זיכערהייט סעקרעטאר מארקוויין מאלין האט געזאגט פאר רעפארטערס ביי א פרעסע קאנפערענץ אינעם ווייסן הויז אז טראמפ איז "פולשטענדיג אריינגעטאן" אין די אישו, און אז ער ארבעט שוין לאנג צו איבערמאכן דעם לאנד'ס אלטע לופט-טראפיק קאנטראל סיסטעם.


לויט די אפיס פון רעפובליקאנער סענאטאר עריק שמיט, האט טראמפ גערעדט מיט אים אויפ'ן טעלעפאן פרייטאג צונאכטס איבער שאפן פאנדן צו מאדערניזירן די לופט-טראפיק קאנטראל.


דערווייל זאגן באאמטע אז זיי האבן נישט געטראפן קיין שום באווייזן אז א סייבער אטאקע איז געשטאנען אונטער דעם אויספאל, אבער מען פארשט נאך אלץ די פונקטליכע אורזאך דערפון. דערווייל בלייבן פילע רייזנדע מיט די פראגע וואס פונקטליך עס האט פאסירט און צי אזא זאך קען זיך איבערחזר'ן אין די צוקונפט.