בס"ד

מדינת ישראל קרעפטן פארניכטן א סטראטעגישע חיזבאללא טונעל אין דרום לבנון


מדינת ישראל קרעפטן האבן פארניכטעט אן אונטערערדישע טונעל וואס האט באלאנגט פאר די טעראר גרופע חיזבאללא אינעם הר דוב געגנט אין דרום לבנון. דאס מיליטער זאגט אז די טעראר אינפראסטרוקטור איז גענוצט געווארן צו פלאנירן און אדורכפירן אטאקעס קעגן ארץ ישראל.


די אפעראציע איז דורכגעפירט געווארן אין די לעצטע 24 שעה אין די חוות שבעא געגנט, דורך זעלנער פון די 810'טע בריגאדע אינאיינעם מיט די ספעציעלע 'יהלום' קאמף-אינזשעניר אפטיילונג.


לויט ווי דאס מיליטער גיט איבער, האט די אונטערערדישע רוטע אנטהאלטן עטליכע וואוין-צימערן און קאמאנד-צענטערן וואס זענען גענוצט געווארן דורך חיזבאללא טעראריסטן צו קאארדינירן אפעראציעס און אויסארבעטן פלענער צו צילן ציווילע בירגער און זעלנער וואס זענען סטאנציאנירט אין די געגנט.


די אנטדעקונג צייגט נאכאמאל ווי שטארק חיזבאללא פארלאזט זיך אויף אונטערערדישע אינפראסטרוקטור צו באהאלטן זייערע אקטיוויטעטן און זיך פלאצירן נאנט צום גרעניץ. די קרעפטן האבן פארענדיגט די אפעראציע מיטן פולשטענדיג חרוב מאכן דעם טונעל, און דערמיט אפגעראמט נאך א וויכטיגע טייל פון די טעראר ארגאניזאציע'ס אינפראסטרוקטור אין דרום לבנון.


דאס מיליטער זאגט אז די אפעראציע איז א טייל פון א ברייטערע קאמפיין צו אפהאלטן חיזבאללא פון דורכפירן אטאקעס. די אונטערערדישע איינריכטונגען האבן געגעבן פאר די טעראריסטן א באשיצטע פלאץ פון וואו זיי האבן געקענט אפערירן און פאראויסרוקן זייערע בייזוויליגע פלענער, וואס האט געשטעלט א דירעקטע געפאר פאר די לאקאלע קהילות און קרעפטן אין די געגנט.


דאס מיליטער האט איבערגעחזר'ט אז זיי וועלן בשום אופן נישט ערלויבן פאר חיזבאללא צו שעדיגן בירגער אדער זעלנער, און האבן צוגעזאגט ווייטער צו נעמען שריט צו עלימינירן סיי וועלכע געפאר ביים צפון גרעניץ. דאס חרוב מאכן פונעם טונעל שטרייכט אונטער די אנגייענדע זיכערהייט טשעלענדזשעס מיט וואס ארץ ישראל ספראוועט זיך, בעת זיי ארבעטן צו צעווארפן חיזבאללא'ס מיליטערישע אינפראסטרוקטור אין דרום לבנון. די קרעפטן בלייבן פאקוסירט אויפצוסוכן און נייטראליזירן געפארן וואס קענען געבן די מעגליכקייט פאר די טעראר גרופע אדורכצופירן אטאקעס.