מדינת ישראל דראון טעכנאלאגיע אין אקציע: 'עראו סענטינעל' אינטעגרירט אירע דראונס מיט די רפאל 'ספייק' מיסלס
נייע מדינת ישראל טעכנאלאגיע: קליינע שפיאנאזש דראונס ווערן אינטעגרירט מיט פארגעשריטענע מיסיל סיסטעמען
מדינת ישראל'ס פארטיידיגונגס טעכנאלאגיע צייגט וויאזוי קליינע שפיאנאזש דראונס קענען ארבעטן האנט-ביי-האנט מיט פארגעשריטענע מיסיל סיסטעמען צו שטיצן פונקטליכע מיליטערישע אפעראציעס.
די פירמע 'עראו סענטינעל' (Aero Sentinel) האט אינטעגרירט איר נייע 'סעניקס' (SENIX) טאקטישע שפיאנאזש דראון מיט די באקאנטע 'ספייק' (Spike) מיסיל פאמיליע פון 'רפאל עדווענסד דיפענס סיסטעמס' דורכאויס גרויסע אינטערנאציאנאלע מיליטערישע איבונגען. די נייע אינטעגראציע ערלויבט פאר די דראון צו טראנסמיטירן לעבעדיגע ווידעא און שפיאנאזש אינפארמאציע, ווי אויך אפדעיטס איבער צילן, צו שטיצן דאס אידענטיפיצירן און אטאקירן צילן וואס געפינען זיך ווייט ארויס פון די דירעקטע זעקראפט פונעם אפערעיטאר.
די 'סעניקס' דראון איז ספעציעל דעזיינט געווארן אז עס זאל קענען ווערן ארויסגעשיקט זייער שנעל דורך איין איינציגע אפערעיטאר. עס פארמאגט סיי בייטאג און סיי טערמאל (נאכט) קאמערעס, עס מאכט גאר ווייניג גערויש, און קען זיך האלטן אין די לופטן פאר א לענגערע צייט. די פלאטפארמע קען פליען פאר ארום 70 ביז 80 מינוט און האט א קאמיוניקאציע רעינדזש פון ביז 10 קילאמעטער, געווענדעט לויט די אומשטענדן. די סיסטעם ווערט שוין לויט באריכטן באנוצט דורך א ספעציעלע איינהייט אין די צה"ל מיליטער, וואס צייגט וויאזוי עס האט זיך אנטוויקלט פון א פשוט'ע טאקטישע שפיאנאזש דראון צו א טייל פון א ברייטערע שפיאנאזש נעצווערק אויפן שלאכטפעלד.
די קאמבינאציע מיט די 'ספייק' מיסילס פון 'רפאל' איז גאר א וויכטיגע שריט, וויבאלד עס קאנעקט לעבעדיגע שפיאנאזש פון די לופטן מיט פונקטליכע אטאקע מעגליכקייטן. די אינפארמאציע וואס ווערט געזאמלט דורך די 'סעניקס' דראון קען העלפן די אפערעיטארס צו טרעפן און באשטעטיגן צילן, באקומען א קלארע בילד פונעם שלאכטפעלד, און דורכפירן אטאקעס אין קאמפליצירטע אומשטענדן. די 'ספייק' פאמיליע נעמט אריין סיסטעמען וואס זענען געמאכט פאר אפעראציעס וואס זענען אינדרויסן פון די זעקראפט, ניצנדיג פארגעשריטענע טעכנאלאגיע צו אטאקירן פון א ווייטע דיסטאנץ. די סוקסעספולע פראבעס צייגן די וואקסנדע וויכטיגקייט פון צוזאמשטעלן דראונס, סענסארס און פונקטליכע וואפן אין איין אינטעגרירטע סיסטעם.
אין די זעלבע צייט גרייט זיך 'עראו סענטינעל' צו פארברייטערן די פראדוקציע פון די 'סעניקס' דראונס, און פלאנט צו אריינברענגען א נייע וויזשועל-באזירטע נאוויגאציע סיסטעם אין יאר 2027. דאס וועט רעדוצירן די אפהענגיקייט אויף סאטעליט נאוויגאציע (GPS) אין פעלער וואס עס זענען דא שטערונגען. די אנטוויקלונג שפיגלט אפ מדינת ישראל'ס כסדר'דיגע אינוועסטמענטס אין דראון סיסטעמען און פארגעשריטענע פארטיידיגונגס טעכנאלאגיע, אין א צייט וואס מיליטערן זוכן צו זאמלען שפיאנאזש פיל שנעלער און האבן בעסערע מעגליכקייטן אויפן שלאכטפעלד.