מדינת ישראל דיפענס פירמע 'עלביט' באקומט ריזיגן קאנטראקט צושטעלן פארגעשריטענע טעכנאלאגיע פאר די דייטשע מיליטער


די מדינת ישראל דיפענס ריז 'עלביט סיסטעמס' האט געווינען א מעכטיגן קאנטראקט צושטעלן פאר די דייטשע ארמיי פארגעשריטענע "פאסיווע דעטעקשאן" סיסטעמען, וועלכע זענען ספעציעל דעזיינט צו אנטדעקן פיינטליכע ארטילעריע פייער אן דעם וואס זיי זאלן ארויסגעבן זייער אייגענע לאקאציע.


דער אפמאך, וואס איז געשלאסן געווארן דורך די דייטשע מיליטערישע פראקיורמענט אפיס, וועט צושטעלן פאר'ן מיליטער ספעציעלע אקוסטישע אפאראטן וואס קענען אידענטיפיצירן פון וואו די פיינטליכע באמבעס קומען. אנדערש ווי נארמאלע ראדאר סיסטעמען וואס שיקן ארויס סיגנאלן און קענען דערמיט ארויסגעבן זייער לאקאציע פאר'ן פיינט, ארבעט די נייע פאסיווע טעכנאלאגיע בלויז דורך 'אויסהערן' און אנאליזירן די קולות וואס ווערן געמאכט דורך די ארטילעריע פייער.


די סיסטעם נוצט עטליכע סענסארס צו דערגיין פונקטליך פון וואו דער פיינט שיסט, וואס דאס גיט פאר די מיליטערישע קאמאנדירן קריטישע אינפארמאציע ווי אזוי צוריקצושלאגן. דער קאנטראקט רעכנט אויך אריין צוגעהערן און טרענירונגען פאר די דייטשע זעלנער. דאס איז נאך א גרויסע געווינס פאר די דייטשע אפטיילונג פון 'עלביט'. דער קאנטראקט איז אפיציעל געמאלדן געווארן דעם 16'טן נאוועמבער, נאכדעם וואס עס איז אונטערגעשריבן געווארן דעם 30'סטן אקטאבער.


דער איינקויף איז א טייל פון א ברייטערע באמיאונג פון דייטשלאנד צו מאדערניזירן אירע ארטילעריע מעגליכקייטן און טוישן די אלטע עקוויפמענט צו מער פארגעשריטענע טעכנאלאגיע. די נייע סיסטעמען וועלן שטארק פארבעסערן די מעגליכקייט פון די דייטשע 'בונדעסווער' (מיליטער) צו אידענטיפיצירן פיינטליכע פאזיציעס און רעאגירן פיל שנעלער, ספעציעל אויפ'ן שלאכטפעלד וואו עס איז קריטיש וויכטיג צו בלייבן באהאלטן פונעם פיינט.


'עלביט סיסטעמס דייטשלאנד' האט באקומען דעם קאנטראקט נאכ'ן קאנקורירן קעגן אן אנדערע פירמע אונטער דייטשלאנד'ס פראגראם. די פונקטליכע פרייז פונעם קאנטראקט און די דעליווערי סקעדזשועל זענען נישט פובליצירט געווארן, אבער דאקומענטן צייגן אז די עקוויפמענט וועט ווערן סטאנציאנירט אין די עמסלאנד ראיאן.


די נייע טעכנאלאגיע וועט געבן פאר די דייטשע קרעפטן א וויכטיגע טאקטישע אויבערהאנט. דער דיעל פארשטארקט נאך מער די פאזיציע פון 'עלביט' אינעם אייראפעאישן דיפענס מארקעט, אין א צייט וואס נאטא מיטגלידער האלטן אין איין אינוועסטירן אין מיליטערישע מאדערניזאציע און פארגעשריטענע טעכנאלאגיע אויפ'ן שלאכטפעלד.