שטארקע 5.9 מאגניטוד ערדציטערניש טרייסלט אויף יאפאן; עמערדזשענסי אלארמען פייפן אין טאקיא אינמיטן די נאכט


א מאכטפולע ערדציטערניש האט אויפגעטרייסלט מזרח יאפאן זונטאג פארטאגס, שיקנדיג א שטארקע שאק-כוואליע דורך די הויפטשטאט טאקיא און אקטיוויזירט עמערדזשענסי ווארענונג סיסטעמען איבער די גאנצע ראיאן.


די יאפאנעזע מעטעאראלאגישע אגענטור האט געמאסטן די ערדציטערניש ביי א 5.9 מאגניטוד, בעת די אמעריקאנער 'USGS' אגענטור האט עס לכתחילה געשאצט אויף 5.8. דער עפיצענטער פונעם ציטערניש איז געווען אין די דרום איבאראקי פראפעקטור, אין א טיפקייט פון ארום 70 קילאמעטער. די שאקן האבן דערגרייכט א שטאפל פון 'אונטערשטע 5' אויף יאפאן'ס סעיסמישע וואגשאל אין טיילן פון איבאראקי און צענטראל טאקיא, וואס האט געמאכט אז מען זאל עס שפירן גאר שטארק איבער די גאנצע געגנט.


ווידעא קליפס פון די נאכט שעות האבן אויפגעכאפט א שרעקעדיגע אטמאספערע, ווען הויכע ווארענונג אלארמען און עמערדזשענסי מעלדונגען האבן אפגעקלינגען איבער די שטאט, בשעת די הויכע וואלקן-קראצערס, הייוועיס און קאנסטראקשן סייטס זענען נאך געווען באלאכטן. יאפאן'ס פארגעשריטענע ערדציטערניש-ווארענונג נעצווערק איז ספעציעל אויסגעשטעלט צו געבן א שנעלע אלערט פאר די איינוואוינער ווי נאר מען שפירט אן ערנסטע סעיסמישע אקטיוויטעט, כדי צו געבן די קריטישע סעקונדעס זיך צו באשיצן. מאביל טעלעפאנען האבן אויך אנגעהויבן פייפן מיט עמערדזשענסי אלערטס, און די רעגירונג האט תיקף אויפגעשטעלט א ספעציעלע טעסק פארס אפצושאצן די סיטואציע.


טראץ די שטארקייט פונעם טרייסל, האבן די אויטאריטעטן בארואיגט אז עס איז נישט דא קיין צונאמי געפאר. אמווייניגסטנס פינף מענטשן זענען באריכטעט געווארן פארוואונדעט אין איבאראקי, טשיבא און סאיטאמא. די טראנספארטאציע סיסטעם האט געליטן פון שטערונגען, אפעקטירנדיג לאקאלע און עקספרעס באנען אין די טאקיא ראיאן. באאמטע האבן אויך באריכטעט איבער א געפלאצטע אונטערערדישע וואסער רער אין טאקיא און צייטווייליגע פאוער אוטעדזשעס וואס האבן אפעקטירט הונדערטער היימען. ביי די נוקלעארע איינריכטונגען זענען נישט באריכטעט געווארן קיין שום פראבלעמען.


די דראמאטישע אלארמען וואס מען הערט אויף די ווידעאס זענען א נארמאלע טייל פון יאפאן'ס קאטאסטראפע-צוגרייטונג סיסטעם. יאפאן ליידט אפט פון ערדציטערנישן צוליב איר לאקאציע ביים פאציפישן אקעאן, וואס מאכט אז די פובליק אלערטס זאלן זיין א רוטינע טייל פונעם טאג-טעגליכן לעבן. הגם די פלוצלינגדיגע אלארמען אינמיטן די נאכט קענען זיין גאר דערשראקן, זענען זיי געמאכט צו מאכן זיכער אז מענטשן נעמען זיך גלייך אין די הענט אריין און זוכן שוץ.


די אויטאריטעטן זענען יעצט פאקוסירט אויף אינספעקציעס, נאכווייען (אפטערשאקס) און צו זען אויב עס זענען דא פרישע שאדנס צו די אינפראסטרוקטור. די איבערנאכט שאק איז געווען נאך א דערמאנונג פאר די איינוואוינער אין טאקיא און די ארומיגע געגנטער אז אן ערדציטערניש קען קומען אן קיין פריערדיגע מעלדונג, און דער קומענדיגער אלערט קען פאסירן פונקט אזוי פלוצלינג.