בס"ד

יאפאן: אמעריקאנער-געמאכטע שפיאנאזש דראון קראכט אריין אין ים

די יאפאנעזער לופט-פארטיידיגונגס קרעפטן האבן פארלוירן קאנטאקט מיט א טייערע 'נארטראפ גראמאן' שפיאנאזש דראון איבערן יאפאנעזער ים, דעם פארגאנגענעם דינסטאג. די פליגער איז פארשוואונדן געווארן פונעם ראדאר ארום 1:00 אזייגער נאכמיטאג, בעת זי איז געווען ארום 50 קילאמעטער אפגערוקט פונעם ברעג פון די 'טאטארי' פראווינץ.

טיילן פונעם דראון זענען שפעטער געזען געווארן שווימען אויפ'ן וואסער אין יענע געגנט, און באאמטע גלייבן יעצט אז עס האט טאקע אריינגעקראכט אינעם ים. דער הויפט פון די יאפאנעזער לופט-קרעפטן, גענעראל טאקעהירא מאריטא, האט באשטעטיגט אז די דראון איז נישט געווען אויף קיין טרענירונגס מיסיע, כאטש ער האט נישט ארויסגעגעבן קיין דעטאלן איבער וואס פונקטליך די מיסיע איז יא געווען, אדער וואס עס האט געפירט צום קראך.

די 'גלאבאל האוק' (Global Hawk) דראון איז געווען איינע פון בלויז דריי אזעלכע פארגעשריטענע דראונס וואס יאפאן פארמאגט, וועלכע זענען סטאנציאנירט ביי די 'מיסאווא' לופט-באזע אין די 'אאמארי' פראווינץ. יאפאן האט אפגעקויפט די פליגערס פון אמעריקע אין יאר 2015 אין א ריזיגע קאנטראקט וואס האט אפגעקאסט ארום 1.2 ביליאן דאלאר.

די מאסיווע דראונס, וואס האבן א פליגל-שפאן פון ארום 40 מעטער און קענען בלייבן אין די לופטן פאר מער ווי 30 שעה אין א ציה, שפילן א גאר וויכטיגע ראלע אין יאפאן'ס שפיאנאזש און אויפפאסונג אפעראציעס אינעם ראיאן. דער פארלוסט לאזט יאפאן מיט א פלאטע פון בלויז צוויי אזעלכע דראונס, און ברענגט ארויף פראגעס איבער די פארלעסליכקייט פון די סיסטעם און וויאזוי דאס וועט אפעקטירן זייערע שפיאנאזש אקטיוויטעטן אין די ארומיגע וואסערן.