דראמאטישע אפעראציע אין עזה: מדינת ישראל קרעפטן פאנגען לעבעדיגערהייט א הויכראנגיקן כאמאס קאמאנדיר

א נייע ווידעא וואס איז ארויסגעשטעלט געווארן דורך די 'אל דזשאזירא' נייעס אגענטור צייגט די דראמאטישע מינוטן פון א ספעציעלע געהיימע אפעראציע וואס איז דורכגעפירט געווארן דינסטאג אינדערפרי אין די מערב זייט פון עזה שטאט. אין די ווידעא זעט מען שווערע שיסערייען און רויך אין די גאסן, בשעת א הויכראנגיקער כאמאס פירער פרובירט צו קריכן און זיך באהאלטן אונטער ביימער נעבן א געביידע, ביז ער איז ענדליך געשאסן און געכאפט געווארן דורך די מדינת ישראל קרעפטן.

די מדינת ישראל לופט-וואפע האט דורכגעפירט מער ווי א צענדליג לופט-אטאקעס אינעם געגנט נעבן דעם 'שאטי' פליטים לאגער אין מערב עזה שטאט דינסטאג אינדערפרי, וואס איז פארגעקומען אין די זעלבע צייט ווי די שיסערייען פון די אפעראציע. דער פארטיידיגונגס מיניסטער ישראל כ"ץ האט שפעטער באשטעטיגט אז די זיכערהייט קרעפטן האבן ארעסטירט מאכמוד אל-אראביד, דער הויפט פון כאמאס'ס אלגעמיינע זיכערהייט אפאראט — א פאזיציע וואס איז די זעלבע ווי דער הויפט פונעם 'שב"כ' אין זייער ארגאניזאציע.

די קאמפליצירטע אפעראציע איז אנגעפירט געווארן פונעם שב"כ'ס ספעציעלע אפעראציעס קאמאנד צענטער אונטער 'פיקוד דרום', מיט די פולע באשטעטיגונג פון די פאליטישע פירערשאפט, און איז לויט באריכטן געפלאנט געווארן פאר עטלעכע חדשים. לאקאלע אראבישע קאלאבארירער, אנגעפירט דורך ראסאן דאהיני פון די 'אבו שאבאב' מיליציע, האבן לויט באריכטן אויך אנטיילגענומען אין די אקציע.

די קרעפטן האבן אדורכגעפירט אן אבלאווע אויף א געביידע אינעם 'אל-קאטיבא' געגנט וואו אל-אראביד האט זיך אויפגעהאלטן מיט זיין פאמיליע. דורכאויס די פייער-אויסטוישן וואס האט אויסגעבראכן, איז אל-אראביד פארוואונדעט געווארן, און פיר פאלעסטינער זענען געהארגעט געווארן, אריינגערעכנט זיין פרוי און זון. ער איז ארויסגעפירט געווארן פון עזה קיין מדינת ישראל פארוואונדעטערהייט אבער ביי זיך, און געפינט זיך יעצט אין שפיטאל אונטער שווערע וואך בשעת ער ווערט אויסגעפרעגט דורך די שפיאנאזש אגענטורן.

אל-אראביד איז א וועטעראן כאמאס טעראריסט שוין זינט די 1990'ער יארן, און האט אנגעפירט מיט די מיליציע אנגעלעגנהייטן פון די ארגאניזאציע, ארבעטנדיג צוריקצוברענגען כאמאס'ס קאנטראל אויפן עזה פאס. מדינת ישראל זיכערהייט באאמטע זאגן אז דאס אים כאפן לעבעדיגערהייט טראגט א גאר וויכטיגע שפיאנאזש ווערד, און שיקט א קלארע מעסעדזש פאר די כאמאס פירערשאפט אז מדינת ישראל איז נאך אלץ אומשטאנד צו אפערירן אויף דער ערד און דערגרייכן צילן טיף אינעם עזה פאס.