אמעריקאנער אמבאסאדאר קיין ארץ ישראל באקומט א ריזיגן 'חזון איש' אתרוג אלס מתנה לכבוד יום טוב סוכות


דער אמעריקאנער אמבאסאדאר קיין ארץ ישראל, מייק האקאבי, האט באקומען אן אויסטערליש גרויסן 'חזון איש' אתרוג ביי א ספעציעלע מיטינג וואס איז פארגעקומען אין די אמעריקאנער אמבאסאדע אין ירושלים, גרייטנדיג זיך צום בעפארשטייענדן יום טוב סוכות.


דער הערליכער אתרוג איז איבערגעגעבן געווארן דורך ר' דובי האניג, גרינדער און אנפירער פון די 'ארטאדאקסישע אידישע טשעמבער אף קאמערס', אינאיינעם מיט הרב חיים מיכאל גוטערמאן, פון די גרינדער פון די באקאנטע 'שובו' מוסדות. די מתנה איז געגעבן געווארן אלס א צייכן פון הכרת הטוב און אפשאצונג פאר האקאבי'ס כסדר'דיגע שטיצע פאר אידן און פאר מדינת ישראל.


ביים איבערגעבן דעם אתרוג, האט ר' דובי האניג מסביר געווען די טיפע באדייט און סימבאליזם וואס ליגט אונטער דעם אתרוג, און ער האט זיך אויסגעדריקט צו האקאבי: "איר האט א הארץ אזוי גרויס ווי דעם אתרוג." דערנאך האט הרב גוטערמאן ארומגערעדט איבער די אייגנארטיגקייט פונעם אתרוג, וואס וואקסט און בלייבט אויפ'ן בוים דורכאויס אלע פיר סעזאנען פונעם יאר.


דער אמבאסאדאר האט רעאגירט מיט גרויס וואונדער צום ריזיגן סייז פונעם אתרוג, זאגנדיג אז ער האט נאך קיינמאל פריער נישט געזען אזאנס. דורכאויס די באגעגעניש האט ער אויך אויסגעהערט איבער די געוואלדיגע חינוך אקטיוויטעטן פון די 'שובו' נעצווערק, און האט אויסגעדריקט א שטארקע אינטערעסע צו קומען באזוכן די מוסדות אין די נאענטע צוקונפט.