8:30 ביינאכט ארץ ישראל צייט — וואל קאמיטע פארבאט דאס נאכספירן וויילער ביי די קלפיות

די צענטראלע וואל קאמיטע אין ארץ ישראל האט ארויסגעגעבן א שטרענגע ווארענונג אז עס איז אבסאלוט פארבאטן פאר פארטיי פארטרעטער צו נוצן סמארטפאן אפליקאציעס אדער אנדערע מיטלען צו טראנסמיטירן אינפארמאציע איבער וועלכע וויילער עס זענען שוין אנגעקומען צו די קלפיות און צי זיי האבן שוין געשטימט.

די קלארשטעלונג קומט נאך עטליכע קלאגעס דורכאויס דעם טאג איבער פארדאכטן אז געוויסע פארטייען שפירן נאך וויילער.

לויט באריכטן, האט די קאמיטע קלארגעשטעלט אז די רעגולאציעס זענען גילטיג פאר אלע פאליטישע פארטייען אן אויסנאם.

דאס קומט נאכדעם וואס נפתלי בנט'ס 'ביחד' פארטיי האט אריינגעגעבן א קלאגע קעגן די ליכוד איבער אומלעגאלע שפיראכץ, כאטש די באשולדיגונגען זענען דערווייל נישט באשטעטיגט געווארן אלס א פאקטישע פארלעצונג.

די קלפיות וועלן זיך אפיציעל פארמאכן 10:00 ביינאכט, און קורץ דערנאך וועלן די טעלעוויזיע סטאנציעס ארויסלייגן זייערע עקסיט פאולס.

8:20 ביינאכט — אנקעטעס צייגן א טיי צווישן ליכוד און ישר; חרדי'שע פארטייען האלטן דעם שליסל

אן עוורעדזש פון די לעצטע אנקעטעס בעפאר די וואלן צייגט א שמאלע פארמעסט, וואו פרעמיער מיניסטער בנימין נתניהו'ס 'ליכוד' און גדי אייזענקאט'ס 'ישר' פארטיי האלטן ביידע ביי 23 בענקלעך. נפתלי בנט'ס 'ביחד' קומט אריין דריט מיט 14 מאנדאטן.

די דעמאקראטן און די אראבישע געמיינזאמע ליסטע באקומען 9 בענקלעך יעדע, ש"ס און עוצמה יהודית 8 יעדע, יהדות התורה, ישראל ביתנו און די רעליגיעזע ציוניסטן 7 יעדע, און רע"מ באקומט 5.

לויט די ציפערן האלטן די חרדי'שע פארטייען (ש"ס און יהדות התורה) אינאיינעם 15 בענקלעך, וואס גיט זיי א געוואלדיגע קראפט און א מאסיווע איינפלוס אין די קומענדיגע קאאליציע פארהאנדלונגען. צו גרינדן א רעגירונג פעלט זיך אויס 61 פון די 120 כנסת בענקלעך.

עס איז וויכטיג צו באטאנען אז דאס זענען בלויז אנקעטעס און שאצונגען, נישט קיין עקסיט פאולס אדער אפיציעלע רעזולטאטן. די ערשטע עקסיט פאולס וועלן פובליצירט ווערן 10:00 ביינאכט.

8:00 ביינאכט — פארטייען פארלאנגען צו פארלענגערן די וואלן צוליב מאסיווע שורות

עטליכע פאליטישע פארטייען האבן אריינגעגעבן א דרינגנדע פארלאנג צו פארלענגערן די שטים-שטונדן, נאכדעם וואס עס זענען באריכטעט געווארן גאר לאנגע שורות ביי קלפיות איבער'ן לאנד.

די ליכוד, ש"ס, עוצמה יהודית און עופר ווינטער'ס 'עם ישראל' פארטיי האבן געבעטן מען זאל לאזן די קלפיות אפן ביז 11:00 ביינאכט, א שעה שפעטער ווי געפלאנט.

די פארטייען טענה'ן אז די שווערע געדרענג קען אפהאלטן מענטשן פון אנקומען שטימען אין צייט. פון די אנדערע זייט האט גדי אייזענקאט'ס 'ישר' פארטיי זיך קעגנגעשטעלט דעם פארלאנג.

די צענטראלע וואל קאמיטע האט דערווייל קלארגעשטעלט אז יעדער וויילער וואס שטייט שוין אין די רייע בעפאר 10:00 ביינאכט וועט באקומען די געלעגנהייט צו שטימען, אפילו אויב די צייט גייט אריבער.

דערווייל איז נאכנישט דא קיין אפיציעלע באשלוס איבער אן אלגעמיינע פארלענגערונג.

7:30 ביינאכט — היסטארישע באטייליגונג: 66.7% האבן שוין געשטימט ביז 6 אזייגער

די צאל וויילער וואס זענען ארויסגעקומען שטימען האלט ביי א רעקארד הויכע 66.7% ביז 6:00 אוונט, לויט אפיציעלע ציפערן פון די וואל קאמיטע.

דאס איז א שפרונג פון 9 פראצענט קעגן די 57.7% וואס מען האט געזען אין די זעלבע צייט ביי די 2022 וואלן.

קרוב צו 4.9 מיליאן בירגער האבן שוין אפגעגעבן זייער שטימע ביז 6 אזייגער, וואס צייגט אויף אן אומגעווענליך שטארקע אינטערעסע און באטייליגונג דורכאויס דעם טאג.

ווי ערווענט, זענען דא ריזיגע שורות ביי די קלפיות, אבער באאמטע בארואיגן אז ווער עס קומט אן פאר 10:00 וועט קענען שטימען.

7:00 ביינאכט — בנט'ס פארטיי באשולדיגט די ליכוד אין אומלעגאלע שפיראכץ

נפתלי בנט'ס 'ביחד' פארטיי האט אריינגעגעבן אן אפיציעלע קלאגע צו די וואל קאמיטע, טענה'נדיג אז ליכוד פארטרעטער נוצן א סמארטפאן עפפ נאכצוספירן וויילער ביי די קלפיות.

לויט די קלאגע, ווערט די אינפארמאציע איבער ווער עס קומט אן שטימען אריבערגעשיקט דירעקט צו פארטיי באאמטע.

די וואל קאמיטע האט אבער דערווייל אפגעווארפן די באשולדיגונגען, זאגנדיג אז זיי האבן נאכנישט באקומען קיין שום קראנטע באווייזן דערויף.

'ביחד' האט אויך באריכטעט אז זיי האבן אריינגעגעבן א באזונדערע קלאגע איבער די באנוץ פון די 'עלעקטאר' עפפ ביי א קלפי אין אונטער-גליל.

6:30 ביינאכט — קאמיטע: קיין באווייזן אויף סיסטעמאטישע פעלשונגען

טראץ פילע קלאגעס פון פארשידענע פארטייען איבער אומסדרים ביי קלפיות, זאגט די צענטראלע וואל קאמיטע אז עס איז נישטא קיין שום באווייז אויף א סיסטעמאטישע קאמפיין צו פעלשן אדער גנב'ענען שטימען.

די קלאגעס האבן אריינגערעכנט באריכטן איבער פעלנדיגע אדער צעריסענע שטים-צעטלעך און פארדאכטן פון פרואוון צו שטערן דעם וואל פראצעס.

די קאמיטע האט אונטערגעשטראכן אז יעדע איינצלנע אינצידענט ווערט באהאנדלט אויפ'ן פלאץ, און האט געבעטן דעם ציבור זיך צו פארלאזן בלויז אויף אפיציעלע אינפארמאציע און נישט אויף קלאנגען וואס פארשפרייטן זיך אויף די סאציאלע נעצן.

6:00 ביינאכט — ח"כ אחמד טיבי פארמישט אין א געשלעג ביי א קלפי אין טייבע

זעט דעם ווידעא אונטן.

טייבע, ארץ ישראל — דער אראבישער כנסת דעפוטאט אחמד טיבי איז געווארן פארמישט אין א היציגע קאנפראנטאציע ביי א קלפי אין די אראבישע שטאט טייבע.

ווידעא קליפס וואס צירקולירן צייגן ווי טיבי טענה'ט זיך הויך מיט אן אנדערן מאן אינעווייניג אין די קלפי.

אנדערע באריכטן געבן איבער אז עס האט אויסגעבראכן א געפעכט צווישן טיבי און די וואל באאמטע איבער די לאנגע שורות און פארהאלטונגען ביים שטימען.

עס איז דערווייל נישט קלאר פונקטליך ווען דער אינצידענט האט פאסירט אדער ווער דער צווייטער פערזאן איז געווען.
 

5:42 נאכמיטאג — פראצענט פון וויילער שפרינגט צו 55.7%

די באטייליגונג ראטע האט דערגרייכט 55.7% ביז 4:00 נאכמיטאג, לויט די וואל קאמיטע.

דאס איז א העכערונג פון 8.2 פראצענט קעגן די 47.5% אין 2022. לשם פארגלייך, אין 2021 האט עס געהאלטן ביי 42.3% און אין 2020 ביי 47.0% אין די זעלבע שטונדע.

5:00 נאכמיטאג — די וואלן גייען אריין אין די אוונט שטונדן; א קריטישע פראבע פאר נתניהו 

די וואלן גייען אריין אין די לעצטע פאזע פון די אוונט שטונדן, ווען פרעמיער נתניהו און די אפאזיציע פארטייען קעמפן אויף טויט און לעבן פאר קאנטראל פון די 120-בענקלעך כנסת. די קלענערע פארטייען, אריינגערעכנט ש"ס און יהדות התורה, קענען שפילן דעם דעצידירנדן ראלע אין די קאאליציע פארהאנדלונגען.

4:00 נאכמיטאג — אומגעווענליך הויכע צאל וויילער באריכטעט

ביז 2 אזייגער נאכמיטאג האבן שוין 44.9% אפגעגעבן זייער שטימע, קעגן 38.9% אין 2022. מער ווי דריי מיליאן אידן האבן שוין געשטימט, וואס מאכט עס פאר די העכסטע באטייליגונג ראטע פאר די צייט פון טאג זינט יאר 1973.

3:00 נאכמיטאג — קלפיות מעגליך אפן נאך 10 ביינאכט

די וואל קאמיטע מעלדט אז ווער עס קומט אן בעפאר 10:00 ביינאכט וועט קענען שטימען, אפילו אויב די לאנגע שורות וועלן פאדערן צו האלטן די קלפיות אפן שפעטער אין דער נאכט.

2:18 נאכמיטאג — פיר ארעסטירט נאך א ווילדע שלאגעריי ביי א קלפי אין רהט

זעט דעם ווידעא אונטן.

א ווילדע שלאגעריי האט אויסגעבראכן דינסטאג ביי א קלפי אין די דרום שטאט רהט, וואס האט זיך געענדיגט מיט פיר ארעסטירטע.

לויט באריכטן, האט זיך די געשלעג אנגעהויבן ווען מיטגלידער פון צוויי פאמיליעס וואס זענען פארמישט אין אן אלטע סכסוך האבן זיך באגעגנט בשעת'ן ווארטן אין די רייע צו שטימען.

ווידעא קליפס צייגן ווי עטליכע פערזאנען טיילן זיך מכות, און עס זענען אויך געפלויגן בענקלעך.

די פאליציי האט ארעסטירט פיר פארדעכטיגטע, און עס ווערן ערווארטעט נאך ארעסטן ווי די אויספארשונג גייט אן.

10:55 פארמיטאג — דריי ארעסטירט אין נגב פאר'ן פרובירן קויפן שטימען

די פאליציי האט ארעסטירט דריי פארדעכטיגטע איבערנאכט אין נגב אויף פארדאכטן פון כאבאר און קויפן שטימען, נאכדעם וואס מען האט געפונען קאווערטן אנגעפילט מיט צענדליגע טויזנטער שקלים צוזאמען מיט וואל מאטעריאלן פאר די אראבישע רע"מ פארטיי.

די פאליציי חושד'ט אז דאס געלט איז געווען געצילט צו באצאלן וויילער אין אויסטויש פאר זייער שטימע פאר רע"מ.

די ארעסטירטע, איינוואוינער פון שגב שלום און ערערה, זענען אפגעפירט געווארן פאר אויספארשונג. די רע"מ פארטיי האט אראפגעריסן די פאליציי אקציע, טענה'נדיג אז מען פרובירט צו שטערן זייערע וואל אקטיוויטעטן.