מעלבורן: קהל עדת ישראל געזעגנט זיך מיט עמאציאנעלע מאמענטן פונעם היסטארישן ביהמ"ד בעפאר די דעמאליציע

מיט גרויס עמאציע און טרערן אין די אויגן האבן זיך חברי קהל עדת ישראל אין מעלבורן פארזאמלט דעם זונטאג, נאוועמבער 15, זיך צו געזעגענען פון זייער היסטארישן בית מדרש. דאס קומט נאנט צו צוויי יאר נאכדעם וואס דאס ביהמ"ד איז שווער געשעדיגט געווארן אין א בייזוויליגע אנטיסעמיטישע ארסאן אטאקע.

טראץ די שווערע רעגנס וואס האבן געגאסן, זענען די בני הקהילה צוריקגעקומען צום פארברענטן שול פאר איין לעצטע פארזאמלונג בעפאר עס ווערט אינגאנצן חרוב געמאכט צו מאכן פלאץ פאר א נייעם, פראכטפולן בנין.

דער עמאציאנעלער מעמד איז אנגעפירט געווארן דורך הגאון רבי שלמה כהן שליט"א, גאב"ד עדת ישראל, וועלכער האט אויפגעטרויטן מיט ווארעמע דברי חיזוק והתעוררות. דער רב האט ארומגערעדט איבער די חשיבות און קדושה פון א בית מדרש און מעורר געווען דעם ציבור זיך צו פארשטארקן אין קדושת בית הכנסת.

נאך די דברי התעוררות פונעם רב, האבן די פארזאמלטע מתפללים אינאיינעם געדאוונט מנחה פאר די לעצטע מאל אינעם געשעדיגטן בנין.

ווי באקאנט, איז די שול חרוב געווארן אין דעצעמבער 2024 ווען בייזוויליגע פארברעכער האבן עס אונטערגעצינדן, א זאך וואס האט געצווינגען די קהילה זיך צו ציען צו א פראוויזארישע לאקאציע פאר די טעגליכע תפילות און שיעורים.

די בוי-ארבעט פונעם נייעם בית מדרש איז ערווארטעט זיך צו אנהייבן אין די קומענדיגע וואכן, און דער גאנצער פראיעקט פון איבערבויען דעם צענטער וועט געדויערן אומגעפער צוויי ביז דריי יאר.

די געזעגענונג צייכנט אפ די ענדע פון א וויכטיגע קאפיטל פאר די חרדי'שע קהילה אין מעלבורן, בשעת די מיטגלידער קוקן ארויס מיט האפענונג צוריק אויפצושטעלן זייער באליבטן צענטער פון תורה און תפילה.