עקאנאמישע ווארענונג: ביליאנער אינוועסטאר רעי דאליא זאגט אז אמעריקע האט נישט קיין אנדערע ברירה נאר צו דרוקן פרישע געלט און אראפרייסן דעם דאלאר


דער באקאנטער ביליאנער און אינוועסטאר רעי דאליא קומט ארויס מיט א שארפע ווארענונג איבער די אמעריקאנער עקאנאמיע, זאגנדיג אז די פאראייניגטע שטאטן האט זיך אריינגעזעצט אין א ווינקל וואו די איינציגסטע וועג ארויס פון אירע ריזיגע חובות איז דורך דרוקן פרישע געלט און אראפווארפן די ווערד פונעם דאלאר.


"די איינציגסטע וועג צו לייזן די חובות פראבלעם איז דורך דרוקן געלט און דעוואלוירן די קארענסי," האט דאליא געזאגט, אנווייזנדיג אז מען קען שוין יעצט זען ווי דאס שפילט זיך אויס אין די טעגליכע עקאנאמיע.


זיינע ווערטער שטימען פונקטליך מיט די נייע דאטא וואס די 'פעדערעל רעזערוו' האט יעצט ארויסגעגעבן. די ציפערן צייגן אז די אזוי-גערופענע "M2" געלט סופליי - וואס רעכנט אריין אלע קעש, טשעקינג און סעיווינגס אקאונטס וואס צירקולירן אין די עקאנאמיע - האט דעם פארגאנגענעם יולי דערגרייכט א רעקארד הויכע סומע פון 23.22 טריליאן דאלאר. דאס רעפרעזענטירט א חודש'ליכע העכערונג פון 102.8 ביליאן דאלאר, און דאס איז שוין די 27'סטע חודש נאכאנאנד וואס די געלט סופליי אין לאנד וואקסט.


כדי צו פארשטיין די גרויסקייט פון די פראבלעם, דארף מען קוקן אויף די היסטאריע. לויט די פעדערעל רעזערוו, וואקסט די געלט סופליי מיט א דורכשניט פון ארום 6 ביז 6.7 פראצענט א יאר זינט יאר 2000. דאליא טענה'ט אז דאס איז א דירעקטע רעזולטאט פון די רעגירונג'ס פראבלעם זיך אן עצה צו געבן מיט אירע חובות. די יעצטיגע ציפערן זענען מיט 1.43 טריליאן דאלאר העכער ווי די פריערדיגע רעקארד אין מערץ 2022. כאטש די געלט סופליי איז אביסל געפאלן ווען די פעדערעל רעזערוו האט אגרעסיוו געהויבן די אינטערעסט ראטעס אין 2022 און 2023 - א זאך וואס איז נישט געשען זינט די 'גרעיט דעפרעשאן' - איז עס אבער געווען א קורצע ערשיינונג, און יעצט שיסט עס צוריק ארויף מיט א שטארקייט.


דאליא ערקלערט זיין טעאריע וואס ער זאגט שוין יארן לאנג: ווען א רעגירונג איז דערטרונקען אין חובות און קען עס נישט באצאלן דורך שניידן בודזשעטן אדער העכערן טעקסעס, וועלן זיי אלס נעמען דעם גרינגסטן וועג ארויס - פשוט דרוקן נאך געלט. דאס דרוקן געלט מאכט נישט די חובות נעלם ווערן, נאר עס עסט אויף די ווערד פונעם געלט שטילערהייט. למעשה נעמט די רעגירונג דעם פרייז פון די חובות און לייגט עס ארויף אויף די פלייצעס פון יעדן איינעם וואס האלט קעש אין באנק. וויבאלד די אמעריקאנער חובות וואקסן אויף א רעקארד טעמפא, שאצט דאליא אז די געלט דרוקעריי וועט זיך נאר פארשנעלערן אין די קומענדיגע יארן, אומאפהענגיג פון וועלכע פאליטישע פארטיי עס איז אין קאנטראל.


געבויט אויף דעם, גיט דער ביליאנער א פראקטישע עצה פאר מענטשן ווי אזוי צו באשיצן זייער געלט: מען זאל נישט האלטן קיין גרויסע סומעס פון קעש. אנשטאט דעם, זאל מען אינוועסטירן אין זאכן וואס האבן אן עכטע ווערד, ווי ריעל עסטעיט, סטאקס, און אנדערע הארטע אקציעס. די סארט אינוועסטמענטס זענען געווענליך מער באשיצט קעגן אינפלאציע, וויבאלד זייער פרייז גייט ארויף צוזאמען מיט די אינפלאציע און די געלט דרוקעריי.


כאטש עקאנאמיסטן דינגען זיך נאך צו דאליא'ס פאראויסזאגונגען וועלן זיך אויסשפילן פונקטליך ווי ער זאגט, איז אבער קלאר אז מיט די געלט סופליי וואס ברעכט פרישע רעקארדס חודש נאך חודש און די אמעריקאנער חובות וואס פליט אין די הימלען, ווערט זיין ווארענונג א טייל פון א וואקסנדע צאל שטימעס וואס פרעגן ווי לאנג די יעצטיגע עקאנאמישע מצב קען נאך אנגיין.