בס"ד


דראמאטישע אינצידענט ביי JFK עירפארט: א מאסיווע ברענשטאף רינונג פון אן 'עיר טשיינע' פליגער פירט צו א קענסעלד פלייט


אן 'עיר טשיינע' פליגער, א באואינג 747-8 וואס איז פון די לעצטע ריזיגע דזשאמבא פליגערס וואס זענען נאך אין באנוץ, האט איבערגעלעבט א שרעקעדיגע אינצידענט ביים דזשעי-עף-קעי (JFK) עירפארט אין ניו יארק. דער פליגער איז געשטאנען ביים געיט גרייט ארויסצופליען קיין בעידזשינג אויף פלייט CA982, ווען א טראק וואס האט אנגעפילט דעם פליגער מיט ברענשטאף (געז) האט זיך פלוצלינג א ריק געטאן בשעת די שלויכן זענען נאך געווען צוגעטשעפעט. דאס האט געפירט צו ערנסטע שאדנס צו די ברענשטאף רערן און א מאסיווע רינונג פון געז איבערן גאנצן טארמאק. דער אינצידענט האט פאסירט אין די פריע פארטאגס שטונדן, קורץ בעפאר די געפלאנטע 2:05 אפפלי צייט.


די רעאקציע איז געווען גאר א שנעלע. עירפארט פייערלעשער זענען תיכף אראפגעקומען אויפן סצענע צו קאנטראלירן די רינונג און אפוואשן דעם טארמאק, א סטאנדארטע אבער וויכטיגע שריט צו פארמיידן א פייער, צוליב די גרויסע מאסן ברענשטאף וואס האט זיך אויסגעגאסן. בילדער וואס זענען פארשפרייט געווארן צייגן ווי די גראונד-סטעף באטראכטן די שאדנס און רייניגן אויף די געז. ברוך השם איז קיינער נישט פארוואונדעט געווארן, סיי אויפן פליגער און סיי צווישן די ארבייטער אויפן פעלד.


וואס פונקטליך עס האט פאסירט אז דער טראק זאל זיך אזוי פלוצלינג א ריק טאן, בלייבט דערווייל א מיסטעריע. ווידעא קליפס פונעם אינצידענט צייגן ווי דער דרייווער מאכט צו די טיר פונעם טראק בלויז עטליכע סעקונדעס בעפאר עס הייבט אן פארן, אבער עס איז נאך נישט קלאר צי דאס איז געווען א מענטשליכע טעות אדער א מעכאנישע פראבלעם.


ווי א רעזולטאט האט 'עיר טשיינע' געקענסעלט דעם פלייט. די פאסאזשירן זענען אבער נישט געווארן אינפארמירט דערוועגן ביז עטליכע שטונדן נאך די אריגינעלע אפפלי צייט. דער פליגער געפינט זיך נאך אלץ ביים JFK עירפארט וואו מען פירט דורך אינספעקציעס און נויטיגע פארריכטונגען, כאטש די שאדן ווערט דערווייל קלאסיפיצירט אלס "לייכט".


דער אינצידענט ציט א ספעציעלע אינטערעסע אין די אוויאציע וועלט, צוליב דעם ספעציפישן פליגער. דער באואינג 747-8, וואס ווערט אפט אנגערופן די "קעניגין פון די הימלען", ווערט היינט צו טאגס כמעט נישט גענוצט פאר פאסאזשירן פלייטס, וויבאלד רוב עירליינס האבן עס שוין ארויסגענומען פון באנוץ לטובת נייערע, מער ברענשטאף-עפעקטיווע פליגערס. דערווייל בלייבט דער ריזיגער פליגער געגראונדעט אין ניו יארק, א דערמאנונג ווי זעלטן עס איז געווארן צו זען די לעגענדארע דזשאמבא פליגערס אין די היינטיגע צייטן.