צה"ל ענדיגט גרויסע מיליטערישע איבונגען ביים סירישן גרעניץ זיך צו האלטן קאמפס-גרייט פאר אומגעריכטע אנטוויקלונגען


די מדינת ישראל מיליטער האט די וואך געמאלדן איבער די סוקסעספולע ענדע פון א פארגעשריטענע מיליטערישע איבונג (דריל) לענגאויס דעם סירישן גרעניץ, א טייל פון די אנגייענדע באמיאונגען צו האלטן די זעלנער קאמפס-גרייט פאר קאמפליצירטע אדער אומגעריכטע סצענארן. לויט די מיליטער, זענען אינעם דריל געווען פארמישט זעלנער פון די גאנצע דיוויזיע, וועלכע האבן געארבעט אינאיינעם מיט ארומיגע יוניטס, די 'פיקוד העורף', לאקאלע פירער פון די שטעטלעך, און לאקאלע הצלה און עמערדזשענסי ארגאניזאציעס. די קאאפעראציע צווישן די מיליטער און די ציווילע איינוואוינער שפיגלט אפ א ברייטערע צוגאנג וואס צה"ל האט אנגענומען אין די לעצטע מאנאטן לגבי דעם צפון גרעניץ, וואו מען באטראכט די קאמפס-גרייטקייט נישט בלויז אלס א מיליטערישע פליכט, נאר אלס א פראדזשעקט וואס נעמט אריין די גאנצע ראיאן און די קאמיוניטיס וואס וואוינען ביים גרעניץ.


די פרישע איבונגען זענען א טייל פון א ברייטערע קייט פון אקטיוויטעטן וואס קומען פאר ביים סירישן גרעניץ דורכאויס דעם לעצטן יאר. די געגנט איז אונטער די פאראנטווארטליכקייט פון די 210'טע דיוויזיע, וועלכע איז געשטעלט צו באשיצן די גולן הייטס און די ארומיגע געגנטער. די דיוויזיע האט לעצטנס דורכגעפירט עטליכע גרויסע דרילס, אריינגערעכנט סצענארן פון א מאסן-קאסאליטעטן אטאקע און א שנעלע רעספאנס, ארויסנעמענדיג לעסאנס פון די אקטאבער 7 אטאקעס. פריערדיגע איבונגען אין די געגנט האבן זיך ספעציפיש קאנצענטרירט אויף א סצענאר פון א פלוצלינגדיגע ערד-אינוואזיע פון עטליכע פראנטן, נאכדעם וואס די מיליטער שאצט אז צענדליגע טויזנטער באוואפנטע טעראריסטן וואס זענען אפיליאירט מיט איראנער-געשטיצטע גרופעס געפינען זיך אין סיריע און איראק, און קענען אנקומען צום גולן גרעניץ אין בלויז עטליכע שעה אונטער די ריכטיגע אומשטענדן.


די איבונגען קומען אויך אין א צייט וואס די מדינה איז שטארק באזארגט איבער די אנטוויקלונגען אינעווייניג אין סיריע, בפרט די באמיאונגען פונעם סירישן פרעזידענט אכמעד אל-שארא איבערצובויען זיין מיליטער צו מער ארגאניזירטע פארמאציעס, אנגעהויבן פון קליינע קאמפאניס און באטאליאנען ביז גאנצע דיוויזיעס. כאטש די מיליטערישע באאמטע זאגן אז שארא'ס קרעפטן זענען דערווייל נישט אויף א הויכע שטאפל פון קאמפס-גרייטקייט, האלטן זיי אבער א נאנטע אויג אויף די אנטוויקלונגען און אויף סיי וועלכע צייכנס אז פיינטליכע עלעמענטן פרובירן זיך צו באפעסטיגן נעבן דעם גרעניץ. דער טשיף אוו סטאף פון די מיליטער, לוטענאנט גענעראל איל זמיר, האט אין די לעצטע וואכן אפגעשטאט א באזוך ביי די 210'טע דיוויזיע און באקוקט טיילן פון דרום סיריע, וואו ער האט קלארגעשטעלט אז די מיליטער וועט בשום אופן נישט ערלויבן קיין שום פיינטליכע קרעפטן זיך צו דערנענטערן צום גרעניץ.


אלעס אינאיינעם, איז די איבונג פון די וואך נאך א רינגעלע אין די קייט פון קאמפס-גרייטקייט וואס די מיליטער האלט אן אויפן צפון פראנט דורכאויס יאר 2026. די מיליטער האט איבערגעחזר'ט אז די דרילס וועלן ווייטער אנגיין אויף א רעגולערע באזיס, אנגעבנדיג אז עס איז גאר וויכטיג צו האלטן די זעלנער גרייט, פארשטארקן די קאאפעראציע צווישן אלע ארגאניזאציעס, און עווענטועל באשיצן די איינוואוינער אין די גולן הייטס און אין גאנצן לאנד. אין א צייט וואס די מדינה געפינט זיך נאך אלץ אין א מולטי-פראנט מלחמה און ווארנט אז אן עסקיליראציע קען אויסברעכן פון סיי וועלכן פראנט אן קיין פריערדיגע ווארענונג, ווערן די סארט דרילס באטראכט נישט סתם אלס א רוטינע טרענירונג, נאר ענדערש אלס אן אנגייענדע 'אינשורענס פאליסי' קעגן די שנעל-טוישנדע אומשטענדן אינעם ראיאן.