בס"ד

אמעריקאנער נעיווי בלאקאדע קעגן איראן פארשטארקט זיך: איבער 100 קאמערציאלע שיפן אפגעשטעלט


נייע ווידעא וואס איז ארויסגעגעבן געווארן דורך די אמעריקאנער 'סענטקאם' (צענטראלע קאמאנד) צייגט ווי אן MH-60 סי-האוק העליקאפטער הייבט זיך אויף פונעם דעק פון די 'יו-עס-עס ראפאעל פעראלטא' קריגס-שיף, בעת די אמעריקאנער נעיווי האלט אן איר שטרענגע ים-בלאקאדע קעגן איראן אינעם אראבישן ים.


לויט ווי סענטקאם גיט איבער, האבן אמעריקאנער קרעפטן ביז דעם 15'טן סעפטעמבער שוין אפגעשטעלט און צוריקגעדרייט 103 קאמערציאלע שיפן וואס האבן פרובירט צו פארן צו אדער פון איראנער פארטן. דאס איז א טייל פון א ברייטערע קאמפיין אפצוהאקן די ים-טראפיק וואס איז פארבינדן מיט איראן. שיפן וואס האבן נישט קיין שייכות מיט איראן מעגן נאך אלץ דורכפארן דעם 'הארמוז דורכגאס', וואס האלט אפן די גלאבאלע שיפינג רוטס, אפילו בשעת די דרוק אויף טעהראן ווערט אלס שטערקער.


די יעצטיגע אפעראציע איז די צווייטע פאזע פון די בלאקאדע, וואס איז צוריק ארויפגעלייגט געווארן אין מיטן יולי נאכדעם וואס א קורצע פייער-אפשטעל איז צאמגעפאלן אין יוני. עס איז איינע פון די מערסט-זעעוודיגע אמעריקאנער מיליטערישע טריט אינעם ראיאן זינט די אנגעצויגנקייט מיט איראן האט ווידער אויפגעפלאמט אנהייב יאר, און עס האט שוין געגעבן א שווערע עקאנאמישע קלאפ פאר איראן.


די טראפיק פון אויל-טאנקירן אריין און ארויס פון די איראנער וואסערן איז דראסטיש געפאלן, וואס שניידט שטארק אריין אין זייערע אויל עקספארטן און איינקונפטן אויף וואס טעהראן איז אנגעוויזן צו האלטן איר עקאנאמיע אין גאנג. אמעריקאנער באאמטע זאגן אז די בלאקאדע איז א וועג צו דערשטיקן איראן עקאנאמיש אן דארפן אנקומען צו דירעקטע מיליטערישע אטאקעס, מיט די האפענונג אז די עקאנאמישע איזאלאציע וועט זיי צווינגען צו מאכן קאנצעסיעס. דערווייל, ווי די צאל אפגעשטעלטע שיפן וואקסט פון וואך צו וואך, זעט נישט אויס ווי די אנגעצויגנקייט אינעם 'גאלף אוו אמאן' גייט זיך ענדיגן אין די נאענטע צוקונפט.