בס"ד

מאקסימום 20 יאר טורמע פאר 'אייסיס' טעראריסט פאר זיין ראלע אין די טויטליכע קאבול עירפארט אטאקע

ווירדזשיניע. – א פעדעראלער ריכטער אין ווירדזשיניע האט ארויפגעלייגט דעם מאקסימום אורטייל פון 20 יאר טורמע פאר מוחאמאד שאריפולא, אן אפגאניסטאנער בירגער און א מיטגליד אין די 'אייסיס-קעי' טעראר גרופע, פאר זיין ראלע אין די שוידערליכע באמבע אטאקע ביים 'עבי געיט' אינעם קאבול עירפארט.


פראקורארן האבן ארויסגעברענגט אין געריכט אז שאריפולא האט אויסגעשפירט דעם וועג וואס דער זעלבסטמערדער טעראריסט האט גענוצט אנצוקומען צום איבערגעפילטן טויער ביים עירפארט דעם 26'סטן אוגוסט 2021, און האט דערנאך איבערגעגעבן פאר די אייסיס פירערשאפט אז דער וועג איז קלאר. די אטאקע האט אומגעברענגט 13 אמעריקאנער זעלנער — אריינגערעכנט 11 מארינען, א נעיווי קארפסמאן, און אן ארמיי סאלדאט — אינאיינעם מיט ארום 160 אפגאניסטאנער ציווילע בירגער, אין די כאאטישע לעצטע טעג פון די אמעריקאנער אפציאונג אונטער פרעזידענט ביידען.


א דזשורי האט אים געפונען שולדיג דעם פארגאנגענעם אפריל פאר'ן צושטעלן מאטעריאלע שטיצע פאר די טעראר גרופע. אבער זיי האבן זיך נישט געקענט פאראייניגן צי זיינע אקטן האבן דירעקט געפירט צו די טויט פעלער, וואס דאס האט אראפגענומען פון טיש די מעגליכקייט פון א לעבנסלענגליכע טורמע אורטייל.


דער טעראריסט איז געכאפט געווארן אין א געמיינזאמע אפעראציע דורך פאקיסטאנער אגענטורן און די אמעריקאנער 'סי-איי-עי' (CIA), און איז עקסטראדירט געווארן קיין אמעריקע אין מערץ, וואו ער איז געהאלטן געווארן אן קיין בעי"ל בעפאר זיין טרייעל.


ביים אורטייל האבן די פראקורארן פארלאנגט די פולע 20 יאר, בעת זיין אדוואקאט האט געבעטן אויף 17 יאר, טענה'נדיג אז ער איז קיינמאל נישט געווען קיין פירער אין אייסיס און איז נישט געפונען געווארן שולדיג אויף א דירעקטע פארבינדונג צו די באמבארדירונג זעלבסט. דער פעדעראלער דזשאדזש, ענטאני טרענגא, האט עווענטועל גענומען די זייט פון די פראקורארן און אים פאראורטיילט צום מאקסימום, מיט וואס ער האט פארמאכט איינע פון די מערסט-נאכגעפאלגטע טעראר טרייעלס אין די לעצטע יארן.


פאר פילע פאמיליעס פון די אומגעקומענע זעלנער ברענגט דער אורטייל א געוויסע מאס פון טרייסט און גערעכטיגקייט, כאטש טייל טענה'ן אז גארנישט ווייניגער ווי א לעבנסלענגליכע טורמע קען נישט פארענטפערן דעם גרויסן פארלוסט.