צענטקאם פארעפנטליכט אינטערעסאנטע ווידעא ווי אמעריקאנער מארינס פילן אן אן 'אספרעי' פליגער אינמיטן די נאכט אינעם מיטל מזרח


די אמעריקאנער צענטראלע קאמאנד (צענטקאם) האט דעם וויקענד ארויסגעגעבן אן אינטערעסאנטע נאכט-ווידעא וואס צייגט ווי אמעריקאנער מארינס פילן אן מיט גאז א מאסיווע 'MV-22 אספרעי' פליגער אין א פאראויסגערוקטע באזע ערגעץ וואו אינעם מיטל מזרח. אין די ווידעא זעט מען ווי די זעלנער פירן דעם ריזיגן פליגער אין די טונקל, באנוצנדיג זיך בלויז מיט קליינע האנט-לעמפלעך.


"אמעריקאנער מארינס פילן אן אן MV-22 אספרעי אינעם מיטל מזרח," האט צענטקאם געשריבן קעפשענדיג די ווידעא. די בילדער קומען אינמיטן די אנגייענדע "עפיק פיורי" אפעראציע, די אמעריקאנער מיליטערישע קאמפיין קעגן איראן, און גיט א זעלטענע בליק אויף די שווערע און קריטישע ארבעט וואס קומט פאר אונטער די קוליסן אויף דער ערד, צו האלטן די אמעריקאנער פליגערס גרייט צום קאמף. כאטש די ווידעא צייגט נישט קיין שום באמבאדירונגען אדער אויפרייסן, ברענגט עס ארויס די וויכטיגקייט פון די טעגליכע אפעראציעס וואס זענען נויטיג צו קענען אנהאלטן א לאנג-טערמין קאמפיין.


דער 'אספרעי' פליגער אליינס איז דאס וואס מאכט אזעלכע סארט אפעראציעס מעגליך. איר ספעציעלע דיזיין ערלויבט איר זיך צו הייבן און לאנדן גראד אויף ארויף און אראפ פונקט ווי א העליקאפטער, און דערנאך דרייען די מאטארן פאראויס צו פליען מיט א שנעלקייט און ווייטקייט ווי א געהעריגע פליגער. דאס מיינט אז די מארינס קענען פירן טרופן און סופלייען צו ווייטע און אפגעזונדערטע ערטער אן דארפן האבן א געהעריגע ראנוועי.


די דאזיגע פאראויסגערוקטע ריפיולינג פונקטן, וואס ווערן אפטמאל אויפגעשטעלט אויף א פראוויזארישן אופן אין אפענע שטחים ווייט פון סיי וועלכע הויפט באזע, ערלויבן פאר די פליגערס צו פארברייטערן זייער קאמף-ראדיוס און ווייטער אנגיין מיט זייערע מיסיעס אן דארפן צוריקפליען ביז א געהעריגע עירפארט. אין א צייט וואס די לופט און פלאטע אפעראציעס גייען אן אין גאנצן ראיאן צוליב די אנגעצויגענע זיכערהייט צושטאנד, דינט אזא ווידעא אלס א דערמאנונג אז אפילו די מערסט פארגעשריטענע היי-טעק פליגערס אינעם מיליטער זענען צום סוף אנגעוויזן אויף די זעלנער אויף דער ערד וואס ארבעטן פלייסיג און שנעל אינמיטן די טונקעלע נאכט.