וויצע פרעזידענט ווענס ווארנט די עליטע אוניווערסיטעטן אויפצוהערן אונטערהאקן אמעריקאנער ארבעטער
וויצע פרעזידענט דזשעי. די. ווענס פארארדנט פעדעראלע אויספארשונג קעגן 9 פון די גרעסטע אוניווערסיטעטן אין לאנד איבער וויזע שווינדל
וויצע פרעזידענט דזשעי. די. ווענס האט געעפנט א נייעם פראנט אין זיין אדמיניסטראציע'ס קאמף קעגן שווינדל, ווען ער האט פארארדנט א פעדעראלע אינוועסטיגעישאן קעגן ניין פון די אנגעזעענסטע ריסוירטש אוניווערסיטעטן אין לאנד, איבער זייער באנוץ מיט 'J-1' עקסטשעינדזש וויזעס.
די שולעס וואס געפינען זיך אונטערן פארגרעסערונגס גלאז זענען הארווארד, יעיל, סטענפארד, בראון, די אוניווערסיטעט פון פיטסבורג, יו-סי דעיוויס, קעלטעק, אריזאנע סטעיט און עמ-איי-טי (MIT). לויט די ציפערן וואס זענען ארויסגעשטעלט געווארן דורך די לעיבאר דעפארטמענט אינספעקטאר דזשענעראל, ענטאני דעספאזיטא, זענען בערך 61 פראצענט פון די ארבעטער און פארשער אין די ניין אינסטיטוציעס אויסלענדישע בירגער אויף J-1 וויזעס, אין פארגלייך צו די 38 פראצענט נאציאנאלע דורכשניט.
די מעלדונג איז געקומען ביי א פרעסע קאנפערענץ פונעם 'פראוד טעסק פארס' אין ווייסן הויז דעם 8'טן אקטאבער, וואו באאמטע האבן אויך געמאלדן איבער די גרינדונג פון א נייע ספעציעלע גרופע וואס וועט זיך אפגעבן מיט נאכגיין ענליכע וויזע שווינדל קעיסעס איבער'ן גאנצן לאנד.
ווענס האט ארגומענטירט אז די אוניווערסיטעטן נוצן אויס J-1 פאזיציעס וואס ווערן פינאנצירט דורך די טעקס-צאלער, כדי צו באצאלן פאר אויסלענדישע ארבעטער און סטודענטן פיל ווייניגער וויפיל אמעריקאנער בירגער מאכן פאר די זעלבע ארבעט. ער האט דאס אנגערופן א דירעקטע פרואוו אונטערצורייסן די לאקאלע געהאלטן דורך אויסנוצן פעדעראלע געלטער.
אינעם זעלבן טאג האט די אדמיניסטראציע סוספענדירט עטליכע ריזיגע טעכנאלאגיע פירמעס, אריינגערעכנט מייקראסאפט, אדאובי, און עטליכע אוטסארסינג קאמפאניס ווי קאגניזענט, אינפאסיס, טאטא, וויפרא, HCL און קעפדזשעמיני, פונעם 'PERM' גרין-קארד פראגראם איבער ענליכע שווינדל קלאגעס.
באאמטע האבן איבערגעגעבן אז די לעיבאר דעפארטמענט'ס פראוד אינוועסטיגעישאנס האבן ביז יעצט געפירט צו 171 קלאגעס און 203 קאנוויקשאנס זינט די טעסק פארס איז געגרינדעט געווארן, און האבן קלארגעמאכט אז נאך ארעסטן און שריט זענען אויפן וועג. דערווייל האט קיין איינע פון די ניין אוניווערסיטעטן נישט ארויסגעגעבן קיין אפיציעלע רעאקציע צו די אויספארשונג בעת די מעלדונג איז ארויסגעקומען.
