בס"ד

איראנער רעוואלוציאנערע גווארדיע פאבריצירט פרישע באריכטן איבער אן אויל טאנקער וואס האט כביכול אויפגעריסן נעבן דעם הארמוז אדורכגאס

די איראנער רעוואלוציאנערע גווארדיע (IRGC) קומט נאכאמאל ארויס מיט פרישע קלעימס איבער א גרויסע אינצידענט נעבן דעם הארמוז אדורכגאס. לויט זייערע רייד, האט א ריזיגע אויל טאנקער אויפגעריסן אין פלאמען נאכ'ן אנשטויסן א ים-מין (naval mine) בעת די שיף האט כביכול פרובירט זיך ארויסצושווערצן פון א פארבאטענע זאנע מיט אויסגעלאשענע נאוויגאציע סיסטעמען.

די גווארדיע זאגט אז דער אויפרייס האט פאסירט אין א דעקלערטע געפארפולע זאנע, און אז מען האט געקענט זען די פלאמען גלייך פונעם איראנער בארטן.

אבער דא קומט דער גרויסער 'אבער': א ווידעא וואס צירקולירט אויף די סאציאלע מידיא וואס זאל כביכול צייגן די ברענענדיגע שיף, איז לויט עקספערטן א פאלשע פאבריצירטע ווידעא. די קליפ איז בלויז א צוזאמשטעל פון עטליכע בילדער וואס ענדיגט זיך מיטן אפיציעלן סימבאל פון די רעוואלוציאנערע גווארדיע. מאריטימע טרעקערס וואס האלטן אן אויג אויף די וואסערן אינעם ראיאן האבן עס שוין אנגעצייכנט אלס 'פעיק', אנווייזנדיג אויף פילע אומפינקטליכקייטן אין די ווידעא וואס שטימען פשוט נישט מיט קיין עכטע אינצידענט.

א היסטאריע פון פאלשע קלעימס

דאס איז ווייט פון די ערשטע מאל וואס איראן'ס קלעימס איבער מינעס נעבן הארמוז פאלן אדורך נאך א גרונטליכע איבערזיכט. בלויז פאריגן חודש האט די IRGC ארויסגעשטעלט א כמעט אידענטישע קלעים איבער דעם טאנקער 'על גייע' (El Gaia) אז עס האט אנגעשטויסן א מין. אבער די אמעריקאנער סענטראל קאמאנד (CENTCOM) האט אפגעווארפן די מעשה אלס פאלש, און קלארגעשטעלט אז די שיף איז באמת געווארן געטראפן פון אן איראנער מיסיל און דראון.

די סארט פאבריצירטע באריכטן זענען א טייל פון איראן'ס ברייטערע סטראטעגיע צו ווייזן קאנטראל איבער איינע פון די וועלט'ס פארנומענסטע אויל שיפינג רוטס, אפילו בשעת עטליכע טאנקערס זענען טאקע יא געווארן געטראפן פון פראדזשעקטיילס אין די ראיאן אין די לעצטע טעג.

דערווייל בלייבט די לעצטע באריכט איבער די טאנקער פייער אומבאשטעטיגט, און אמעריקאנער באאמטע האבן שוין א לאנגע רעקארד פון אוועקמאכן איראן'ס קלעימס איבער מינעס אלס פשוט'ע דיסאינפארמאציע.