מאסיווע קראקדאון דורך די טראמפ יוסטיץ דעפארטמענט: 76 אנגעקלאגט אין א האלב-ביליאן דאלאר טעקס פראד סקאנדאל


די טראמפ יוסטיץ דעפארטמענט (DOJ) האט אראפגעלאזט א שווערן האמער אויף טעקס פראד, מעלדנדיג קלאגעס און אורטיילן קעגן 76 אנגעקלאגטע וועלכע זענען פארמישט אין איבער 490 מיליאן דאלאר אין שווינדלערייען איבער'ן גאנצן לאנד. די ערשטע פאזע פון די נאציאנאלע אפעראציע האט אריינגעצויגן 35 יו. עס. אטוירני אפיסעס און אגענטן פון די 'איי אר עס' (IRS) קרימינאלע אינוועסטיגעישאן אפטיילונג, וועלכע האבן געארבעט אומאויפהערליך פאר זעקס וואכן אונטער די נייע טעסק פארס אויסצורייסן פראד.


איינע פון די מערסט אויפפאלנדע קעיסעס קומט פון דזשארדזשיע, וואו דריי מעקסיקאנער בירגער זענען אינדייטעט געווארן פאר'ן אנפירן א 74 מיליאן דאלאר סקעם, אין וועלכע זיי האבן אריינגעגעבן איבער 16,000 פאלשע טעקס ריטוירנס. לויט די קלאגעס, האבן די מענער באקומען מעקסיקאנער אידענטיפיקאציע דאקומענטן, און דאס גענוצט צו באקומען ITIN נומערן (אינדיווידועלע טעקספעיער אידענטיפיקאציע נומערן). דערנאך האבן זיי אריינגעגעבן פאלשע טעקס ריטוירנס צו קענען קעשן ריפאנד טשעקס פונעם אמעריקאנער טרעזשורי. פראסעקיוטערס זאגן אז די אפעראציע איז געווען גאר פונקטליך אויסגעארבעט אויסצונוצן לעכער אינעם סיסטעם און ארויסשעפן געלט וואס באלאנגט פאר די אמעריקאנער שטייער צאלער.


פעדעראלע אינוועסטיגעיטארס באצייכענען דעם פארנעם פונעם שווינדל אלס "שאקירנד" און זאגן אז מען האט געלאזט די פראד אנגיין פאר א לאנגע צייט. די דריי מעקסיקאנער האבן פארוואנדלט געגנבעטע אדער פאלשע איי-דיס אין א פאבריק פאר פאלשע קלעימס, פארפלייצנדיג דעם סיסטעם מיט ריטוירנס וואס האבן פראדוצירט עכטע ריפאנד טשעקס וואס זיי האבן דערנאך איינקעשירט.


באאמטע שטרייכן אונטער אז דאס איז בלויז איין קליינע טייל פון א פיל גרעסערע נאציאנאלע קראקדאון. די אויטאריטעטן ווייזן אן אז די קעיסעס זענען נישט קיין איינצלינע פעלער, נאר א טייל פון א קאארדינירטע אקציע צוריקצובאקומען הונדערטער מיליאנען דאלארן און שיקן א קלארע מעסעדזש אז שפילן מיט'ן טעקס קאוד וועט מער נישט טאלערירט ווערן, און מען וועט אפשטעלן די וואס באגייען זיך מיט די IRS ווי אן אפענע ATM מאשין.


די יוסטיץ דעפארטמענט פראד אפטיילונג לייגט א גרויסע געוויכט אויף דעם, און פלאנט צו פארשטארקן די קאנטראל אויף וויאזוי אידענטיפיקאציע נומערן ווערן ארויסגעגעבן און גענוצט. די אדמיניסטראציע זאגט אז די ערליכע טעקספעיערס זענען די וואס צאלן דעם פרייז ווען אזעלכע סקעמס זענען סוקסעספול, און מען ערווארט אז נאך קעיסעס וועלן ארויפשווימען ווי נאר די טעסק פארס גראבט ווייטער אריין אין ענליכע שווינדלערייען איבער'ן לאנד.