ספעקטאקולערע ערשיינונג אין די פרימארגן שטונדן: א 'ספעיס עקס' ראקעט לאזט איבער א הערליכע ליכטיגע וואלקן אין די הימלען


איינוואוינער לענגאוס די פלארידע ברעגעס וועלכע זענען אויפגעשטאנען פארטאגס, האבן מיטגעהאלטן אן אויסטערלישע און ספעקטאקולערע ערשיינונג אין די הימלען, וואס פילע האבן אראפגעמאלן ווי א גלאנצנדיגע 'דזשעלי-פיש' וואס שוועבט אין די לופטן.


די וואונדערליכע סצענע איז געקומען אלס רעזולטאט פון א 'ספעיס עקס פאלקאן 9' ראקעט וואס איז ארויסגעשאסן געווארן פון קעיפ קענעוועראל, טראגנדיג קארגא סופלייען צום אינטערנאציאנאלן ספעיס סטאנציע.


ווי עקספערטן ערקלערן, פאסירט דאס ווען די ראקעט הייבט זיך הויך אין די אטמאספערע, און די רויך וואס קומט ארויס דערפון שפרייט זיך אויס אין די דינע לופט. וויבאלד עס איז נאך געווען פארטאגס, האט די הויכע רויך שוין אויפגעכאפט די ערשטע שטראלן פון די זון, בעת אויף דער ערד איז נאך געווען אינגאנצן טונקל. דאס האט באשאפן א הערליכע, ליכטיגע וואלקן מיט לאנגע שטרייפן וואס האט זיך שטאטליך גערוקט איבערן האריזאנט.


כאטש וואס אזעלכע ערשיינונגען זענען באקאנט ביי ראקעט ארויסשיסונגען וואס קומען פאר ביי זון-אויפגאנג אדער זון-אונטערגאנג, איז די יעצטיגע פאל געווען אומגעווענליך קלאר און ליכטיג. די ליכטיגקייט איז געווען אזוי שטארק, אז מענטשן האבן עס געקענט זען פיל ווייטער ווי די לאקאלע פלארידע געגנט, און די סצענע האט זיך געצויגן ביז גאר קיין ווירדזשיניע.


בילדער און ווידעאוס פון די ליכטיגע וואלקן האבן זיך גאר שנעל פארשפרייט אויף סאשעל מידיע, וואו טויזנטער האבן אויסגעדרוקט זייער וואונדער איבער די הערליכע סצענע. ספעיס ענטוזיאסטן האבן אנגעוויזן אז די קאמבינאציע פון די הויכקייט, די פונקטליכע צייט און די וועטער אומשטענדן האבן זיך פערפעקט צוזאמגעשטעלט צו שאפן דעם ספעציעלן 'דזשעלי-פיש' אויסזען.


די ראקעט זעלבסט האט סוקסעספול פארגעזעצט איר רייזע און דעליווערט די קארגא צום ספעיס סטאנציע ווי געפלאנט. פאר די טויזנטער מענטשן וואס האבן אנגעהויבן זייער טאג מיט דעם אומפארגעסליכן בליק, האט עס געדינט אלס א שיינע דערמאנונג פון די כסדר'דיגע ספעיס אקטיוויטעטן וואס קומען פאר אין פלארידע.