זעלטענע דראון פוטעדזש: צווייט-גרעסטע באשעפעניש אויף די וועלט געכאפט אויף ווידעא ביים עסן נעבן די ברעגן פון וועילס


א דראון האט אפגעכאפט אן אויסטערלישן מאמענט ווי א 'פין וואלפיש' (fin whale) - די צווייטע גרעסטע לעבעדיגע באשעפעניש אויף די פלאנעט - עפנט אויף איר ריזיגן מויל און שלינגט איין טויזנטער גאלאנען וואסער נעבן די פעמבראקשיר ברעגן אין וועילס. די פוטעדזש, וואס איז רעקארדירט געווארן דורך דעם ווידעאגראפירער ריס מארגען, ווייזט ווי די וואלפיש ציט אויס איר מויל אריינצונעמען ביז 18,000 גאלאנען וואסער און קליינע פישעלעך אויף איין מאל.


מארגען איז ארויסגעפארן כאפן פיש מיט א פריינט ווען דאס האט פאסירט. ער זאגט אז עס איז געווען ריין מזל אז זיין דראון האט פונקט אפגעכאפט די וואלפיש אינמיטן עסן און שווימען אינאיינעם מיט דאלפינען. די 'פין וואלפיש', וואס איז נאר קלענער פון די 'בלו וואלפיש', קען וואקסן ביז 24 מעטער לאנג און וועגן ביז 70 טאן, וואס מאכט איר פאר איינע פון די גרעסטע חיות וואס האבן נאר אמאל געלעבט. טראץ איר ריזיגן סייז, איז זי א שנעלע שווימער וואס פארברענגט רוב פון איר לעבן אין די טיפע אקעאן, און קומט ארויף צום אויבערפלאך בלויז פאר קורצע מינוטן בעפאר זי פארשווינדט זיך צוריק אונטער די כוואליעס.


מארגען, אן איינוואוינער פון האוטאן אין פעמבראקשיר, ארבעט בייטאג אין אן אויל רעפיינערי און זאגט אז ער איז אויפגעוואקסן אויפ'ן וואסער. ער איז אריינגעפאלן אין די האבי פון כאפן ים-ווידעאס נאכ'ן נוצן א חבר'ס דראון אפצוכאפן ים-באשעפענישן. ער זאגט אז "מאמענטן ווי דאס מאכט א מענטש שפירן זייער קליין דארט אינדרויסן." ער לייגט צו אז זיין גרופע פרובירט אלץ צו האלטן א דיסטאנץ פון די חיות ווען זיי זענען אויפ'ן שיפל, אבער צומאל קומען די וואלפישן ארויף פונקט נעבן זיי ווען זיי זענען געאנקערט און כאפן פיש.


ד"ר מאריאנא טשימיענטי, אן עקספערט איבער ים-באשעפענישן אין די באנגאר יוניווערסיטי, האט עס אנגערופן א "זעלטענע און גליקליכע טרעפונג." זי ערקלערט אז כאטש עסן ביים אויבערפלאך איז א נארמאלע טייל פון זייער נאטור, איז אבער גאר ספעקטאקולער דאס צו זען אזוי נאנט צו די ברעגן. זי האט צוגעלייגט אז אין טעאריע וואלטן די וואלפישן שוין געדארפט מיגרירן אוועק פון דארט צו דעם צייט פונעם יאר. מ'ווייסט זייער ווייניג איבער די מיגראציע פון די 'פין וואלפישן', אבער מ'גלייבט אז עס איז אנדערש ווי אנדערע וואלפישן, כאטש זיי געפינען זיך געווענליך מער אין די העכערע לאטיטודס אין די ווארעמע חדשים און אין די נידריגערע לאטיטודס אין די קאלטע חדשים.