ראקלאנד קאונטי מאן טראגיש אומגעקומען נאכן ווערן געשאסן אין זיין קאר אויפ'ן דזשארדזש וואשינגטאן בריק


א 46-יעריגער מאן פון ראקלאנד קאונטי איז טראגיש אומגעקומען נאכדעם וואס ער איז געפונען געווארן געשאסן אין זיין קאר אויפ'ן אויבערשטן שטאק פונעם דזשארדזש וואשינגטאן בריק, דינסטאג נאכט אקטאבער דעם 20'סטן. דער אינצידענט האט געפירט צו א ברייטע פאליצייאישע אויספארשונג און שווערע טראפיק פאר שעות לאנג.


די שיסעריי איז פארגעקומען אויף די זייט פונעם בריק וואס פירט קיין ניו זשערסי, וואו די פאליציי האט געפונען דעם פארוואונדעטן דרייווער אין א 'וואלקסוואגאן' קאר נעבן די ענדע פונעם בריק. עמערדזשענסי רעספאנדערס האבן אפגעפירט דעם קרבן צום ענגלוואוד שפיטאל, וואו דאקטוירים האבן ליידער געמוזט באשטעטיגן זיין טויט.


לויט לאקאלע נייעס באריכטן, איז דער אומגעקומענער געווען אן 'אף-דוטי' ארבייטער פאר די קאן-עדיסאן קאמפאני. דעטעקטיווס און אויספארשער קוקן יעצט אריין אין די מעגליכקייט צי די שיסעריי איז געקומען אלס רעזולטאט פון א 'ראוד-רעידזש' קאנפראנטאציע אויפ'ן הייוועי, כאטש די פונקטליכע אומשטענדן וואס האבן געפירט צום אינצידענט זענען נאך נישט אפיציעל באשטעטיגט געווארן.


פאליציי האט באלד אפגעשפארט די גאנצע ארומיגע געגנט בשעת אויספארשער האבן אונטערגעזוכט די קאר און דעם שאסיי פאר באווייזן. די אויספארשונג האט געצווינגען די פאליציי צו פארמאכן דעם גאנצן אויבערשטן שטאק פונעם בריק אין די דירעקציע קיין ניו זשערסי, וואס האט אנגעמאכט מאסיווע טראפיק און שווערע פארהאלטונגען פאר טויזנטער דרייווערס וואס פארן טעגליך צווישן מאנהעטן און פארט לי, ניו זשערסי, אויפ'ן דזשארדזש וואשינגטאן בריק, וואס איז באקאנט אלס איינע פון די פארנומענסטע בריקן אין די ראיאן.


דערווייל גייט די אויספארשונג אן אין פולן שוואונג צו דערגיין די גענויע מאטיוון אונטער די טראגישע שיסעריי. עס איז דערווייל נישט דא קיין שום אינפארמאציע איבער א פארדעכטיגטן אדער אן ארעסט אין פארבינדונג מיטן פאל.