בס"ד

כאאס אין פאריז: שווערע צוזאמענשטויסן צווישן פאליציי און פראטעסטירער ביי מאסיווע דעמאנסטראציעס

פאריז האט זיך פארוואנדלט אין א רעגנדיגע שלאכטפעלד דעם שבת, אקטאבער 24, ווען פראנצויזישע ראיאטן-פאליציי האבן זיך א לאז געטון אויף שווארץ-געקליידעטע מיליטאנטן צום ענדע פון א מאסיווע דעמאנסטראציע.

א ווידעא פונעם סצענע צייגט ווי פאליציי אפיצירן אין פולע געווער רייסן זיך אדורך דעם רויך פון טרערן-גאז אין ריכטונג פון א גרופע וואס, לויט באריכטן, האט פרובירט אויפצושטעלן מעטאלענע באריקאדעס צו פארכאפן די פאליציי אינעווייניג. כאטש די באריכטן זענען נישט באשטעטיגט געווארן דורך אפיציעלע קוועלעס, איז אבער יא באשטעטיגט געווארן אז די פאליציי האט געשאסן טרערן-גאז און גענוצט וואסער-קאנאנען נאך וואס טייל פראטעסטירער האבן אנגעהויבן ווארפן פלעשער און שטיינער אויף די אפיצירן.

לויט די אויטאריטעטן האבן זיך ארום 110,000 מענטשן באטייליגט אינעם פראטעסט אין פאריז, אלס א טייל פון א געשאצטע 410,000 מענטשן וואס זענען ארויס אין די גאסן איבער גאנץ פראנקרייך. דער פראטעסט, וואס איז געקומען אלס רעזולטאט פון אויפברויז איבער שולע פאנדינג, די הויכע פרייזן פון לעבנס-קאסטן און אומגלייכהייט, איז מערסטנס אריבער רואיג און איז געווען באגרעניצט צו די סאוט-איסט עק פון די שטאט אונטער שטרענגע רעגולאציעס.

אפיציעלע קוועלעס געבן איבער אז ארום 500 "ראיאטירער" האבן זיך צוזאמגעשטויסן מיט די פאליציי, כאטש זיי האבן אנגעוויזן אז די געוואלדטאטן זענען געווען שוואכער ווי די פריערדיגע וואך. א שווערע רעגן האט אפגעשוואכט דעם פראטעסט, וואס דאס קען זיין די סיבה פארוואס מען האט געזען ווייניגער פייערן ווי ביי פריערדיגע אומרוען.

פאריזער פראקורארן האבן באריכטעט 64 ארעסטן. אין די זעלבע צייט האט דער אפאזיציע פירער, זשאן-לוק מעלענשאן, שארף פארדאמט די פאליציי און זיי באשולדיגט אין שיסן אויף פראטעסטירער אן קיין שום חשבון.

מיט פרישע פראטעסטן וואס זענען שוין גערופן געווארן אויף די קומענדיגע טעג, בלייבט די גרויסע פראגע ווער די מיליטאנטן זענען באמת געווען, וואס זייערע פלענער זענען געווען, און צי די שווערע פאליצייאישע רעאקציע וועט בארואיגן די אומרוען אדער נאר צוגעבן אויל צום פייער.