בס"ד

רעגירונגען איבער די וועלט פאדערן פון בירגער זיך צוצוגרייטן צו מעגליכע עמערדזשענסיס; פענטאגאן גרייט זיך אויף 90 טעג אן קיין עלעקטריציטעט


רעגירונגען איבער די וועלט בעטן מער און מער פון בירגער אז מען זאל זיך אנגרייטן פאר עמערדזשענסי פעלער, אנווייזנדיג ווי שנעל טעגליכע געברויכן קענען ווערן שווער צו באקומען ווען די נארמאלע אינפראסטרוקטור פאלט צוזאם.


אין ענגלאנד האט די רעגירונג ארויסגעשטעלט א "בי רעדי" (זייט גרייט) קאמפיין, וואס רעקאמענדירט פאר יעדן הויזגעזינד צו האלטן גענוג בעיסיק סופלייס צו קענען איבערלעבן כאטש דריי טעג אן קיין הילף. אין יאפאן האט דער קאטאסטראפע מיניסטער געבעטן פון פאמיליעס צו האלטן א מינימום פון דריי טעג פראוויזיעס, און לכתחילה גענוג פאר א גאנצע וואך.


די אמעריקאנער מיליטער גרייט זיך אויף א לענגערע קריזיס

דערווייל אין אמעריקע, ארבעט די פענטאגאן אויף א נייע פראדזשעקט אונטערן נאמען "פארטרעס" (FORTRESS), וואס צילט צו פארשטארקן די זעלבסטשטענדיגקייט פון גרויסע מיליטערישע באזעס איבער אמעריקע. דער ציל איז אז די באזעס זאלן קענען אנגיין פאר כאטש 90 טעג אן זיך דארפן פארלאזן אויף ציווילע עלעקטריציטעט, וואסער, גאז אדער סופליי טשעינס. דער סעקרעטערי אוו דעפענס, פיט העגסעט, האט אויך אונטערגעשטראכן די וויכטיגקייט אז מיליטערישע באזעס זאלן קענען פראדוצירן זייער אייגענע עלעקטריציטעט אומאפהענגיג פון די ציווילע פאוער גריד.


דער גרויסער קאנטראסט צווישן די דריי טעג וואס מען רעקאמענדירט פאר פריוואטע שטיבער, קעגן די 90 טעג וואס דאס מיליטער גרייט זיך, צייגט ווי ערנסט די נאציאנאלע זיכערהייט עקספערטן קוקן אן די מעגליכקייט פון א לאנג-טערמיניגע אינפראסטרוקטור צוזאמפאל.


וואס דארף מען טון?

די הויפט זארג איז נישט נאר איבער א מיליטערישע קאנפליקט, נאר ענדערש איבער די טעגליכע סיסטעמען וואס האלטן אן דעם נארמאלן לעבנסשטייגער, אריינגערעכנט עלעקטריציטעט, קאמוניקאציע, טראנספארטאציע און עסן סופלייס. א לענגערע פאוער אוטעדזש קען אפשטעלן פרידזשידערס, אויסלעשן וויכטיגע מעדיצינישע אפאראטן און איבערהאקן קאמוניקאציע, בשעת חרוב'ע וועגן קענען פארהאלטן עמערדזשענסי הילף פון אנקומען אין צייט.


דערפאר בעטן די רעגירונגען אז מען זאל זיך אנגרייטן מיט פראקטישע געברויכן ווי טרינק וואסער, עסן וואס פאדערט נישט קיין קאכן, וויכטיגע מעדיצינען, פלעשלייטס, באטערי-געטריבענע ראדיאס, און א קלארע פלאן וויאזוי די פאמיליע וועט קאמוניקירן. מען רעקאמענדירט אז מענטשן זאלן איינקויפן די עמערדזשענסי סופלייס צוביסלעך, לויט זייערע פינאנציעלע מעגליכקייטן, אנשטאט אויסצוגעבן אסאך געלט אויף איין מאל.


זיך אנגרייטן מיינט אויך טראכטן פון אנדערע. מען דארף זיכער מאכן צו קוקן אויף עלטערע שכינים און ארויסהעלפן פאמיליעס וואס האבן מענטשן וועלכע זענען אנגעוויזן אויף עלעקטרישע מעדיצינישע מאשינען. דער אלגעמיינער מעסידזש איז אז עמערדזשענסי גרייטקייט איז נישט נאר צו קענען אליין איבערלעבן א קריזיס, נאר אויך צו קענען ארויסהעלפן אנדערע אין די צייט וואס נארמאלע סערוויסעס זענען אפגעהאקט.