בס"ד

בראנקס: א גרויסע גרופע פון די 'בלעק היברו איזראעליטס' האבן זיך פארזאמלט ביי א מארש פאר אן אומגעקומענעם יוגנטליכן


א גרויסע המון עם פון די 'בלעק היברו איזראעליטס' זענען געזען געווארן אנגעטוהן אין פוירפל קאלירטע סוועטערס מיט די אויפשריפט "AN ORGANIZED NATION", ווען זיי האבן זיך פארזאמלט נעבן דעם 'דזשויס קילמער פארק' אין די בראנקס, דעם פארגאנגענעם נאוועמבער 7, 2026. אין ווידעאס וואס זענען פארשפרייט געווארן אויף סאשעל מידיא, זעט מען ווי די גרופע שרייט לאזונגען מיט אויפגעהויבענע פויסטן, וואס האט געצויגן אסאך אויפמערקזאמקייט פון פארבייגייער.


די פארזאמלונג איז פארגעקומען אינעם זעלבן צייט און פלאץ וואו עס איז אפגעהאלטן געווארן אן אפיציעלע מארש און פראטעסט פאר דעם 15-יעריגן דזשאוויטס פרימפאנג, אן אימיגראנט פון גהאנא. עס איז דערווייל נאך אומקלאר צי די צוויי געשעענישן זענען געווען פאראויס געפלאנט צוזאמען, אדער עס האט זיך פשוט אויסגעשטעלט אז זיי זענען פארגעקומען אויפן זעלבן ארט.


דער יונגער פרימפאנג איז געשאסן געווארן אין בויך און אומגעקומען דעם 29'סטן אקטאבער בעת ער איז געגאנגען צופוס צו זיין שולע. דער פאל האט אויפגעטרייסלט די בראנקסער איינוואוינער און האט געפירט צו עטליכע מארשן און רופן פאר גערעכטיגקייט. זיין פאמיליע זאגט אז די שיסעריי האט א שייכות מיט דעם וואס ער איז געווארן געטשעפעט (בולליד) דורך אנדערע, און די פאליצייאישע אויספארשונג גייט נאך אן.


שפעטערדיגע באריכטן צייגן אז די גרופע אין די פוירפל קליידער האבן זיך שפעטער אנגעשלאסן מיט די שטיצער פון פרימפאנג אינעם מארש, און טייל פון זיי האבן געהאלטן שילדן מיט די אויפשריפט "Stop The Bullying". דאס האט צוגעגעבן צו די פאדערונגען פון די קאמיוניטי אז די לאקאלע פירער זאלן נעמען שטרענגערע שריט קעגן גאן געוואלדטאטן און טשעפערייען צווישן יוגנטליכע. עס בלייבן אבער נאך אסאך פראגעס אפן, אריינגערעכנט ווער עס האט ארגאניזירט די גרופע, פארוואס זיי זענען געקומען, און וואספארא ראלע זיי וועלן שפילן אין די קאמף פאר גערעכטיגקייט פאר דזשאוויטס.