בס"ד

דראמאטישע רעטונג אפעראציע: 14 מאטראזן געראטעוועט פון א זינקעדיגע פראכט-שיף אין כינע


דראמאטישע רעטונג פוטעדזש צייגט דעם מאמענט ווי כינעזע רעטונגס-טיעמס שלעפן ארויס אלע 14 קרו מעמבערס צו זיכערהייט, נאכדעם וואס די 'דזשיא טשענג 799' פראכט-שיף וואס האט געטראגן א שווערע לאסט פון שטאל, האט זיך געזונקען אינעם דרום 'יעלאו סי' (געלער ים) דעם 9'טן נאוועמבער 2026.


די שיף, וואס איז געבויט געווארן אין יאר 2004, איז געווען אויפ'ן וועג פון שאנכיי קיין קינגדאו, ווען עס האט פלוצלינג אנגעהויבן ארייננעמען מאסיווע קוואנטומס פון וואסער אין צוויי פון אירע קארגא אפטיילונגען, וואס האט געפירט דערצו אז די שיף זאל זיך אנהייבן שטארק אנגייגן אויף איין זייט. די וועטער אומשטענדן זענען געווען גאר שווער צוליב א קאלטע כוואליע וואס האט געברענגט מאכטפולע 'קראפט-8' ווינטן און ריזיגע כוואליעס פון ארום 4 מעטער הויך. ווי די שיף האט זיך גענויגט און די סיטואציע איז געווארן דעספעראט, זענען עטליכע פון די מאטראזן אריינגעפאלן אינעם ברויזנדן וואסער. דאס אלעס האט זיך אפגעשפילט ארום 20 ים-מייל אפגערוקט פונעם בינהיי פארט אין די דזשיאנגסו פראווינץ.


די 'איסט טשיינע סי רעסקיו ביורא' האט באלד רעאגירט מיט א קאארדינירטע אפעראציע פון די לופט און ים, ארויסשיקנדיג די 'דאנגהיי דזשיו 116' רעטונגס-שיף אינאיינעם מיט צוויי העליקאפטערס צום סצענע. די רעטער האבן באוויזן ארויסצושלעפן די גאנצע קרו, אריינגערעכנט די וואס זענען אריינגעפאלן אין וואסער, און אלע 14 זענען אפגעראטעוועט געווארן. דאס איז אן אומגלויבליכע רעזולטאט נעמענדיג אין באטראכט די שטורמישע וועטערס און ווי שנעל א פראכט-שיף קען אונטערגיין איינמאל עס הייבט אן ארייננעמען וואסער.


די פונקטליכע אורזאך פארוואס די שיף האט אנגעהויבן ארייננעמען וואסער איז דערווייל נישט קלאר, און עס בלייבט א פראגע צייכן וואס פונקטליך עס האט פאסירט אין יענע צוויי קארגא אפטיילונגען. דערווייל דינט די דראמאטישע פוטעדזש אלס א לעבעדיגע דערמאנונג ווי שנעל דער ים קען זיך איבערקערן אויף א שווער-געלאדנטע שיף, און ווי וויכטיג עס איז צו האבן א שנעלע און גוט-קאארדינירטע רעטונגס אפעראציע.