אמעריקאנער מיליטער האלט אן שטרענגע נעיווי בלאקאדע קעגן איראן; פרישע 'טעסק פארס' געגרינדעט אפצוהאקן גרעניצן


די אמעריקאנער צענטראלע קאמאנד (סענטקאם) האט די וואך געמאלדן אז די אמעריקאנער קרעפטן ארבעטן ארום די זייגער צו האלטן דעם הארמוז דורכגאס אפן פאר קאמערציאלע פראכט שיפן, בעת זיי פירן אן א שטרענגע און "אייזערנע" נעיווי בלאקאדע קעגן איראן.


דער דורכגאס פירט געווענליך ארום א פינפטל פון די וועלט'ס אויל סופליי, וואס דאס מיינט אז סיי וואספארא אומרוען דארט ווערט גלייך געפילט ביי די געז פאמפען ווייט אוועק פונעם מיטל מזרח. לויט סענטקאם, האט די בלאקאדע שוין אפגעהאלטן מער ווי 25 ביליאן דאלאר ווערד פון איראנער אויל פון אנקומען צו קויפער, און קרוב צו 150 שיפן זענען צוריקגעוויזן געווארן.


זיי האבן אויך צוגעגעבן אז די הויפט רעזערווירטע וועגן אינעם דורכגאס זענען ריין פון ים-מינעס, כאטש איראן האט באריכטעט אז אן אויל-טאנקיר האט לעצטנס אריינגעקראכט אין א מינע און זיך אונטערגעצינדן.


אין די זעלבע צייט האט סענטקאם געמאלדן אז זיי ארבעטן אינאיינעם מיט אנדערע אמעריקאנער אגענטורן אפצושטעלן די איראנער רעוואלוציאנערע גווארדיע פון נוצן יבשה וועגן און דעם קאספישן ים צו שמוגלען פארגעשריטענע געווער, טעכנאלאגיע, סאנקציאנירטע מאטעריאלן און אומלעגאלע געלטער.


די אפעראציע ווערט אנגעפירט דורך א נייע גרופע אונטערן נאמען "טעסק פארס אייראן געיט" (Task Force Iron Gate), וואס דעקט אלע איראנער לאנד-גרעניצן און דעם קאספישן ים. אבער סענטקאם האט דערווייל נישט ארויסגעגעבן קיין דעטאלן ווי אזוי פונקטליך מען גייט אפכאפן די פראכטן אדער וועלכע פארטן ווערן געצילט, און ביז דערווייל איז נאכנישט באשטעטיגט געווארן קיין שום קאנפיסקאציע אונטער די נייע טעסק פארס.


אנאליסטן ווייזן אן אז אמעריקע האט נישט קיין שטענדיגע נעיווי צוטריט צום קאספישן ים, וואס ברענגט פילע צו פרעגן ווי אזוי דאס גייט פאקטיש ארבעטן אין רעאליטעט. די אלע ציפערן און קלעימס קומען פונעם אמעריקאנער מיליטער, בעת איראן האט עפנטליך קריטיקירט וואשינגטאן'ס צוגאנג.