היסטארישער אבער טיילווייז-דורכגעפאלענער פראבע: ספעיס-עקס כאפט סוקסעספול דעם 'סטארשיפ' ראקעט, אבער דער 'בוסטער' עקספלאדירט


די פירמע 'ספעיס-עקס' האט פרייטאג, נאוועמבער 13, ארויסגעשאסן איר 'סטארשיפ פלייט 15' ראקעט פון 'סטארבעיס' אין טעקסאס, אין וואס ווערט באצייכנט אלס זייער דרייסטע פראבע ביז יעצט, זייענדיג די ערשטע מאל וואס זיי האבן פרובירט צו כאפן ביידע טיילן פונעם ראקעט.


דער 'סופער העווי' בוסטער (דער אונטערשטער טייל פונעם ראקעט) האט אפגערופן דעם פלאן צו ווערן געכאפט דורך די טורעם ארום זעקס מינוט נאכן ארויסשיסן, און האט זיך אריבערגעצויגן צום גאלף אוו מעקסיקא, וואו עס האט עקספלאדירט קורץ בעפארן אריינפאלן אין וואסער. ספעיס-עקס האט לכתחילה אנגעוויזן אויף א פראבלעם מיט די נאוויגאציע סיסטעם, כאטש שפעטערדיגע באריכטן האבן געצייגט אז אן אלארם איבער א מאנגל אין ברענשטאף (לאו-פיועל) בעת'ן זיך צוריקדריען האט געפירט דערצו.


דערווייל האט דער אויבערשטער טייל פונעם ראקעט, באקאנט אלס 'שיף 42', דערגרייכט דעם ארביט פאר בלויז דאס צווייטע מאל אין די היסטאריע פונעם פראגראם. עס האט דאן סוקסעספול ארויסגעלאזט 26 'סטארלינק V3' סעטעלייטס.


אבער די שווערסטע טייל פון די מיסיע איז נאך געלעגן פאראויס. נאך ארום 22 שעה און 14 רייזעס ארום די ערד-קוגל, האט זיך 'שיף 42' צוריקגעקערט קיין סטארבעיס שבת, נאוועמבער 14, און איז סוקסעספול געכאפט געווארן צווישן די "טשאפסטיק" ארעמעס פונעם לאנטש-טורעם ארום 4:20 נאכמיטאג (אי-טי). דאס איז געווען דאס ערשטע מאל וואס א סטארשיפ אויבערשטע טייל ווערט געכאפט, נאכדעם וואס ביז יעצט האט ספעיס-עקס בלויז געכאפט די סופער העווי בוסטערס און די שיף אליינס פלעגט מען אלעמאל אראפברענגען אינעם אקעאן.


די סוקסעספולע כאפ איז א ריזיגע שריט פאראויס צו ספעיס-עקס'ס ציל פון א פולשטענדיגע און שנעל-איבערניצבארע ראקעט. די עקספלאוזשען פונעם בוסטער בלייבט אבער א שטרויכלונג, און די פראגע איז יעצט ווי שנעל ספעיס-עקס וועט קענען פאררעכטן דעם פראבלעם און פרובירן נאכאמאל צו כאפן ביידע טיילן פונעם ראקעט.