א גאר דערהויבענער שבת איז אריבער אויף די חשוב׳ע תושבים הנחשונים שיחי׳ אינעם פריש-באנייטן עיר ואם בישראל לעיקפראנט. ס׳איז געווען א שבת בראשית תרתי משמע, ווען די העכער זיבעציג איינוואוינער אינאיינעם מיט די בונים ומקימים האבן מקבל שבת געווען אינעם אויסגעגארטן שטאט אויף וועלכן מען ארבעט שוין אזא לאנגע צייט, די התרגשות איז געווען געוואלדיג.

דער שבת איז געפראוועט געווארן בראשות הרה״ג רבי זושא אויש שליט״א, חבר וועד הרבנים דלעיקפראנט, אינאיינעם מיטן יו״ר וועד החינוך הרב אברהם דוב ערנטאל שליט״א. אזוי אויך האט באשיינט דעם שבת דער בונה ומקים העסקן הרב חיים מאיר מארקאוויטש, און ר׳ אליעזר בינער.

ביים זמן שבת איז פארגעקומען דער ערשטער מנין מנחה פאר די וועלכע דאווענען פארן זמן, און א האלבע שעה דערויף האט מען אנגעהויבן דעם גרויסן מנין מיט אן התלהבות. נאכפאלגענדיג ביי קבלת שבת איז צוגעגאנגען פארן עמוד הרה״ג ר׳ חיים מאיר כ״ץ שליט״א, נכד האדמור״ים מוויען און וויז׳ניץ ב״ב שליט״א. אין ביהמ״ד האט אפגעהילכט דער ווארעמער לכה דודי פון אלע תושבים אינאיינעם.

דערנאך איז מען געגאנגען עסן די סעודות שבת, יעדער ביי זיך אינדערהיים. שפעטער אויפדערנאכט איז פארגעקומען א הערליכן באטע אין שטוב פונעם הגה״צ ר׳ זושא אויש שליט״א, ווי מען איז זיך צאמגעקומען און געזינגען שירות ותשבחות אינאיינעם, אלע תושבים כאיש אחד בלב אחד.

כמעשהו בליל שבת כך מעשהו בבוקר, דער דאווענען שבת אינדערפרי איז פארגעקומען ברוב פאר והדר. די עליות האבן זיך פארקויפט פאר הערליכע סכומים, ווען דער עולם האט זיך ווארעם אנגערופן. באלד נאכן דאווענען איז פארגעקומען א הערליכער חתן בראשית קידוש, צוגעשטעלט דורכן בונה ומקים הרב יודל פערלשטיין, און דער רב שליט״א האט אויפגעטרעטן מיט טרעפליכע דיבורים, און בעאיינדרוקט די חשוב׳ע איינוואוינער, ארויסברענגענדיג ווי מ׳האט דא אנגעהויבן בויען א הערליכע שטאט, לעיני כל ישראל – בראשית.

שבת נאכמיטאג איז פארגעקומען א הערליכע קינדער פראגראם און חברת תהלים, דורכן מחנך נפלא און תושב הר״ר טובי׳ לייב שטערן, מ׳האט פארטיילט נאשערייען און געזאגט תהלים, ווי אויך האבן די קינדער געהערט א דראמאטישע געשיכטע פונעם פה מפיק מרגליות. דערנאך האט מען געדאוונט מנחה ברוב עם, און זיך געוואשן צו שלש סעודות בצוותא חדא, זינגענדיג אינאיינעם די זמירות, און זיצנדיג צוזאמען בשבת אחים, אלע איינוואוינער אויפאמאל.

דער שבת איז געווען לעילא ולעילא, און טראץ די שוועריגקייטן וואס זענען אויפגעשווימען, שטייענדיג אין אזעלכע היסטארישע און גורל׳דיגע טעג, זענען די איינוואוינער אמביציעז און פאזעטיוו, ארויסקוקנדיג אויפן הצלחה פון דעם הערליכן ישוב. אלע באטייליגטע זענען ארויס באגייסטערט און צופרידן, וואונטשנדיג זיך א גוטע וואך און א מזל׳דיגע וואך, ארויסקוקנדיג אויף נאך א וואך ווען פרישע איינוואוינער וועלן ווייטער קומען צו שטראמען, און אינאיינעם באזעצן דעם הערליכן און הייליגן שטאט, לעיקפראנט.

אויף די ווידעא'ס קען מען זען:

די פרייליכע מאמענטן ווען דער מקווה טהרה הייבט זיך אן אנפילן מיט פרישע מי גשמים.