מדנ"י קרעפטן פירן דורך א רייע לופט-אטאקעס אין דרום לבנון נאך א חיזבאללא דראון אנגריף


מדינת ישראל קרעפטן האבן דורכגעפירט א כוואליע פון לופט-אטאקעס אין דרום לבנון מיטוואך איבערנאכט, נאכדעם וואס די טעראר גרופע חיזבאללא האט ארויסגעשאסן צוויי אויפרייס-דראונס אין ריכטונג פון די זעלנער וואס אפערירן אינעם 'עלי אל-טאהער' ראיאן.


די מיליטער האט איבערגעגעבן אז די זעלנער האבן געעפנט פייער אויף איינע פון די דראונס און עס סוקסעספול אראפגעשאסן, און ברוך השם איז נישט געווען קיין שום פארוואונדעטע. אלס רעזולטאט האט די מיליטער באמבארדירט חיזבאללא אינפראסטרוקטור אינעם 'נאבאטיע' געגנט, וואס לויט די מיליטער זענען די פלעצער גענוצט געווארן צו פלאנירן און דורכפירן אטאקעס קעגן מדנ"י זעלנער און ציווילע בירגער.


לבנון באריכטן האבן געמאלדן איבער שווערע באמבארדירונגען איבערן גאנצן ראיאן דורכאויס די נאכט. צווישן די געגנטער וואס זענען געווארן באטראפן ציילן זיך נאבאטיע אל-פאווקא, כפאר רומאן, אראב סאלים, און דער עלי אל-טאהער ראיאן.


די אומרוען האבן זיך ווייטער געצויגן אריין אין מיטוואך טאג. די אפיציעלע לבנון נייעס אגענטור האט באריכטעט אז א מדינת ישראל דראון אטאקע אין נאבאטיע האט איבערגעלאזט איין טויטן און נאך איין פארוואונדעטן. א צווייטע דראון אטאקע האט לויט באריכטן געטראפן א געביידע אין אן אנדערע טייל פון די שטאט.


די איבערנאכט פייער-אויסטוישן קומען אין א צייט וואס מדינת ישראל זעלנער פירן ווייטער אן זייערע אפעראציעס טיף אין דרום לבנון. א טאג פריער האט די מיליטער געמאלדן אז די קרעפטן האבן אפערירט אינעם געגנט קעגן חיזבאללא אינפראסטרוקטור און האבן געפונען אנטי-טאנק מיסילס, ארויסשיסערס, אויפרייס מאטעריאל און אנדערע וואפן.


די מיליטער האט מיטוואך קלארגעשטעלט אז די אטאקעס נאכן דראון אינצידענט זענען געווען געצילט צו עלימינירן אן אוממיטלבאריגע סכנה, און אז זייערע אפעראציעס קעגן חיזבאללא'ס פרואוון צו אטאקירן די קרעפטן וועלן אנגיין אין פולן קראפט.