בס"ד

מדינת ישראל קראפטן רייניגן אויס 'אונרווא' קאמפלעקס אין צפון ירושלים; פלאנירן אויפצובויען נייע קאמיוניטי צענטער

דינסטאג האבן מדינת ישראל פאליציי, אינאיינעם מיט די מיליטער און די ירושלים מיוניסיפאליטי, אנגעהויבן אן אפעראציע צו עוואקואירן אן 'אונרווא' (UNRWA) צענטער אין דעם קאפר אקאב געגנט, צפון פון ירושלים. דער נאציאנאלער זיכערהייט מיניסטער איתמר בן גביר איז אראפגעקומען צום ארט און געלויבט דעם שריט אלס א טייל פון אינפארסירן די נייע געזעצן וואס באגרעניצן די אקטיוויטעטן פון די יו-ען אגענטור. דאס קומט אלס א טייל פון א ברייטערע קאמפיין קעגן אונרווא, נאכדעם וואס מדינת ישראל באאמטע האבן אנטפלעקט אז די ארגאניזאציע האט טיפע פארבינדונגען מיט כאמאס טעראריסטן.

בן גביר האט ארויסגעברענגט אז די אפעראציע צייגט ווער עס איז דער בעל הבית, זאגנדיג: "סואווערעניטעט ווערט נישט בלויז דעקלערט, מען דארף עס פראקטיש דורכפירן." די רעגירונג טענה'ט אז אונרווא האט נישט וואס צו זוכן אין ירושלים. פון די אנדערע זייט טענה'ט אונרווא אז זייער קאלאנדיע צענטער שטעלט צו וויכטיגע טרענירונגען און בילדונג פאר הונדערטער פאלעסטינער פליטים יעדעס יאר, און זיי זענען קעגן דעם וואס מען טרייבט זיי ארויס.

דער שטח גייט אבער נישט בלייבן ליידיג. לויט די אויסערן מיניסטעריום און די ירושלים מיוניסיפאליטי, גייט דער פלאץ פארוואנדלט ווערן אין א ריזיגע קאמיוניטי און בילדונגס קאמפלעקס וואס וועט דינען טויזנטער אראבישע איינוואוינער. איבער 40 מיליאן שקל איז שוין באשטעטיגט געווארן פאר די ערשטע פאזע פונעם פראדזשעקט, וואס וועט ארייננעמען שולעס, א מעטשעט, ספארטס פאסיליטעטן און אנדערע קאמיוניטי סערוויסעס. א נייע שטאטישע היי-סקול פאר אינגלעך ווערט ערווארטעט זיך צו עפענען דארט אלס א טייל פונעם פלאן.

אונטער די קוליסן קומט אויך פאר א לעגאלע געפעכט איבער די אייגנטום פונעם שטח. מדינת ישראל באאמטע זאגן אז די לאנד באלאנגט שוין צום קק"ל (Jewish National Fund) זינט יאר 1937 און איז געווארן אוועקגעלייגט פאר שטאטישע אנטוויקלונג. אונרווא האלט זיך אבער ביי דאס אייגענע, אז דאס איז א יו-ען פאסיליטי אין מזרח ירושלים, און ווארנט אז דאס איבערנעמען דעם קאמפלעקס וועט שטערן די סערוויסעס וואס זיי געבן פאר ארום 340 יונגע פאלעסטינער פליטים יערליך.

די דראמאטישע סצענעס אין קאפר אקאב זענען א טייל פון א פיל גרעסערע געראנגל איבער ווער עס קאנטראלירט די מוסדות, שטחים און פובליק סערוויסעס אין און ארום ירושלים. בשעת מדינת ישראל זעט דאס אלס א שריט צו אינפארסירן אירע געזעצן און אויפצוטוישן אונרווא מיט פערמאנענטע קאמיוניטי אינפראסטרוקטור, קוקן עס די פאלעסטינער אן אלס א דירעקטע אטאקע אויף די אינטערנאציאנאלע אגענטור. יעצט ווען דער שטח ווערט אויסגערייניגט פאר די נייע פראדזשעקט, בלייבט איבער צו זען צי די נייע געביידעס וועלן דינען אלס א בלייבנדע סימבאל פון מדינת ישראל קאנטראל, אדער צי עס וועט פירן צו פרישע רייבונגען אינעם ביטערן קאמף איבער די צוקונפט פון אונרווא.