סעקרעטערי אוו סטעיט מארקא רוביא ווארנט שטרענג סטעיט דעפארטמענט אפישעלס איבער אומעטישע אויפפירונגען

סעקרעטערי אוו סטעיט מארקא רוביא האט לויט באריכטן געווארנט הויכראנגיגע סטעיט דעפארטמענט אפישעלס אז אומעטישע אויפפירונגען קען זיי קאסטן זייערע פאזיציעס, אומאפהענגיג פון זייערע פאליטישע קשרים אדער איינפלוס. לויט אן עקסקלוסיוון באריכט פון די 'רויטערס' נייעס אגענטור וואס איז ארויסגעקומען נאוועמבער 7, האבן פיר קוואלן וואס זענען באקאנט מיט די דעטאלן איבערגעגעבן איבער א מיטינג אונטער פארמאכטע טויערן וואס איז פארגעקומען פאריגע וואך, בעפאר די נאוועמבער 3 מידטוירם עלעקשאנס.

ביי די מיטינג האט רוביא געזאגט פאר די אפישעלס, אריינגערעכנט ארום צוויי טוץ 'עסיסטענט סעקרעטעריס' פונעם דעפארטמענט, אז די ארבייטער מוזן זיך האלטן צו זייערע באשטימטע פליכטן און אויסמיידן קאנפליקט אוו אינטערעסט. ער האט אויך אויסגעדרוקט זיין אומצופרידנהייט מיט אפישעלס וואס נעמען אונטער פאליסי שריט אדער מאכן וויכטיגע באשלוסן אן זיך געהעריג דורכרעדן מיט די פירערשאפט. אונטער די נייע תקנות וואס ער האט אראפגעשטעלט, וועלן גרויסע באשלוסן מוזן באקומען אן אפראוואל אדער פון רוביא אליינס, אדער פונעם דעפיוטי סעקרעטערי אוו סטעיט, קריסטאפער לאנדאו. די סטעיט דעפארטמענט האט זיך אנטזאגט פון קאמענטירן איבער די מיטינג.

די מיטינג האט אויך געצויגן אויפמערקזאמקייט וויבאלד עס איז פארגעקומען קורץ בעפאר די רעזיגנאציע פונעם געוועזענעם סטעיט דעפארטמענט פאליסי טשיף, דזשערעמי לואין. לויט באריכטן איז זיין אפזאג געווען פארבונדן מיט קריטיק אז ער האט געארבעט אינדרויסן פון זיינע באשטימטע פליכטן און נישט נאכגעפאלגט געוויסע אנווייזונגען. אבער לואין אליינס האט שארף אפגעלייקנט די קלאנגען אז מען האט אים ארויסגעווארפן, זאגנדיג פאר רויטערס אז זיין אפזאג איז שוין געווען געפלאנט וואכן פריער און האט גארנישט צוטון מיט די מיטינג אדער מיט די פירערשאפט פונעם דעפארטמענט. א סטעיט דעפארטמענט אפישעל האט אנגערופן זיין אפזאג אלס א געמיינזאמע באשלוס, און רויטערס האט אנגעמערקט אז קיינער פון זייערע קוואלן האבן נישט פארבונדן לואין'ס רעזיגנאציע מיט קיין שום אומעטישע אויפפירונגען.

אין צוגאב האט רוביא איינגעפירט א שטרענגערע קאנטראל אויף אויסלאנד רייזעס דורך פאליטישע סטאף, וואס וועט פון יעצט אן פארלאנגען אן אפראוואל פון זיין אפיס. די ברייטערע שריט קומט נאך א סקאנדאל ארום די געוועזענע אמעריקאנער אמבאסאדאר קיין גריכנלאנד, קימבערלי גילפאויל, וועלכע האט רעזיגנירט נאכדעם וואס באריכטן האבן אויפגעברענגט פראגעס איבער אנגעבליכע אויפטוישן פון צוטריט פאר געלט און טובות; גילפאויל האט אפגעלייקנט די באשולדיגונגען. רוביא'ס שריט צייגט אויף א שטארקע שטופ פאר שטרענגערע אינערליכע קאנטראל, קלארערע אויטאריטעט ליניעס, און מער פאראנטווארטליכקייט איבערן גאנצן סטעיט דעפארטמענט.